КъумпIыл Мурат Хьалъэкъуаерэ Псэкъупсэрэ ащыIагъ

Адыгеим и ЛIышъхьэу КъумпIыл Мурат Адыгэ­къалэ икъэлэ кой хэхьэрэ къуаджэу Хьа­лъэкъуаерэ къутырэу Псэкъупсэрэ ты­гъуа­сэ ащыIагъ.

Программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм тетэу гъэ­рекIо икIэуххэм адэжь физкультурэ-спорт комплексхэр мы псэупIэхэм ащагъэпсыгъэх. Ахэр Адыгэкъалэ икIэлэцIыкIу-ныбжьыкIэ спорт еджапIэ иструктурнэ подразделениеу щытых.

Республикэм ипащэ игъу­сагъэх АР-м мэкъу-мэщымкIэ иминистрэу Къуанэ Анзаур, Адыгэкъалэ имэрэу ЛIыхэсэ Махьмуд, АР-м физкультурэмрэ спортымрэкIэ и Комитет итхьаматэу Дэгужъые Мурат, АР-м и Къэралыгъо Совет — Хасэмрэ Адыгэкъалэ инароднэ депутатхэм я Советрэ ядепутатхэр.

Хьалъэкъуаерэ Псэкъупсэрэ адашIыхьэгъэ спорт комплекс­хэм спортзал дэгъухэр ахэтых, волейболымкIэ, баскетболымкIэ, бэнэнымкIэ, теннисымкIэ, боксымкIэ ящыкIэгъэ обору­до­ваниер ахэм ачIэт. ЦIыфхэм япсауныгъэ зыщагъэпытэрэ физ­культурэ комплексхэм джащ фэдэу зытIэкIыпIэхэр, ме­дицинэ кабинетхэр, тренерхэм, къэрэгъулхэм, техническэ IофышIэхэм атегъэпсыхьэгъэ унэхэр ахэтых. Зыныбжь икъугъэхэми мыщ фэдэ спорт комплексхэм япсауныгъэ щагъэпытэн, физкультурэм щыпы­лъынхэ алъэкIыщт.

ЦIыфхэм япсауныгъэ зыщагъэпытэрэ физкультурэ комп­лексыкIэхэр къызызэпеплъы­хьэхэ нэуж КъумпIыл Мурат кIэлэцIыкIу-ныбжьыкIэ спорт еджапIэм къекIуалIэхэрэми, тренерхэми адэгущыIагъ, спорт Iофтхьабзэхэм зызэрафагъэ­хьазырырэм кIэупчIагъ.

Хьалъэкъуаерэ Псэкъупсэрэ адэсхэм республикэм ипащэ «тхьауегъэпсэу» къыраIуагъ къоджэдэсхэм яфэныкъоны­гъэхэм ынаIэ ренэу къызэратырагъэтырэм фэшI. КъумпIыл Мурат цIыфхэм электроэнер­гиер, газыр, псыр къазэраIэ­кIа­хьэрэм, муниципальнэ учреж­дениехэм Iоф зэрашIэрэм къа­кIэупчIагъ.