Урысые Федерацием и Президент и Администрацие ипащэ иапэрэ гуадзэу Сергей Кириенкэм Адыгэ Республикэм и ЛIышъхьэу КъумпIыл Мурат Щытхъум иорден тыгъуасэ Кремлым къыщыритыжьыгъ.
Шъугу къэтэгъэкIыжьы Урысыем и Президентэу Владимир Путиныр Указэу «Урысые Федерацием икъэралыгъо тынхэр афэгъэшъошэгъэным ехьылIагъ» зыфиIорэм 2021-рэ илъэсым бэдзэогъум и 2-м зэрэкIэтхэжьыгъэр. Адыгэ Республикэм исоциальнэ-экономикэ хэхъоныгъэ иIахьышхо зэрэхшIыхьэрэм фэшI Адыгеим и ЛIышъхьэ а къэралыгъо тыныр къыфагъэшъошагъ.
Адыгеимрэ Урысыемрэ хэхъоныгъэ ягъэшIыгъэнымкIэ Iофэу ышIэрэм осэшхо къызэрэфашIыгъэм фэшI КъумпIыл Мурат хэгъэгум ипащэхэм «тхьашъуегъэпсэу» ариIуагъ. Адыгэ Республикэм и ЛIышъхьэ зэрэхигъэунэфыкIыгъэмкIэ, республикэм исхэм щыIэныгъэм илъэныкъо зэфэшъхьафхэм, мамырныгъэмрэ зэгурыIоныгъэмрэ ягъэпытэн яIахь зэрахашIыхьэрэм мы тыныр къакIэкIуагъ.
«Урысые Федерацием и Президентэу Владимир Путиным, Урысые Федерацием и Правительствэ, ФедерациемкIэ Советым, Къэралыгъо Думэм яIэпыIэгъу ишIуагъэкIэ республикэм социальнэ-экономикэ хэхъоныгъэ егъэшIыгъэнымкIэ мы аужырэ уахътэм гъэхъагъэ горэхэр тшIынхэ тлъэкIыгъ, пандемием ыпкъ къикIырэ чIыпIэ къинхэр зэпытчынхэу зыдгъэсагъ. Хэгъэгум и Президент цIыфхэм ящыIэкIэ-псэукIэ зыкъегъэIэтыгъэнымкIэ пшъэрылъ шъхьаIэу къыгъэнэфагъэм изэшIохын тишъыпкъэу тыдэлажьэ. Федеральнэ гупчэм ащкIэ ищыкIэгъэ амалхэр тфызэхищагъэх. Ахэр лъэпкъ проектхэр, къэралыгъо программэхэр, Адыгэ Республикэм хэхъоныгъэ зэришIыщт унэе про-граммэр ары. Республикэм пшъэ- рылъэу иIэр къэкIуапIэхэр зэкIэ зэхиугъоенышъ, хэкIыпIакIэхэм алъыхъунэу, мурадэу иIэхэм афэкIонэу ары», — къыIуагъ КъумпIыл Мурат.
Адыгеим и ЛIышъхьэ зэрэхигъэунэфыкIыгъэмкIэ, хэбзэ къулыкъухэм джыри тапэкIэ анаIэ нахь зытырагъэтыщтыр социальнэ инфраструктурэм зегъэушъомбгъугъэныр, экономикэм зыкъегъэIэтыгъэныр, IофшIэпIэ чIыпIакIэхэр зэхэщэгъэнхэр, инвестициехэр нахьыбэу къахалъхьаныр, къалэ, къуаджэ пэпчъ щыIэкIэ амалэу ащыряIэр нахьышIу шIыгъэныр ары.