Адыгеим и ЛIышъхьэу КъумпIыл Мурат старшэ лейтенантэу Валерий Заволянскэм иунагъо ихьэкIагъ. Урысые Федерацием и ЛIыхъужъыцIэ фагъэшъошагъ ащ идунай зехъожь нэужым.
Республикэм и ЛIышъхьэ гущыIэгъу афэхъугъ ЛIыхъужъым янэ-ятэхэмрэ ышыпхъурэ, щыIакIэу яIэм, яфэныкъоныгъэхэм защигъэгъозагъ. Акъо дэгъоу зэрапIугъэм пае Заволянскэхэу Иванрэ Анжэлэрэ зэрафэразэр КъумпIыл Мурат къыхигъэщыгъ ыкIи къыткIэхъухьэхэрэр джащ фэдэ лIыхъужъхэм ящысэ кIырыплъынхэ зэрэфаер къыIуагъ.
Республикэм и ЛIышъхьэ къызэрэхигъэщыгъэмкIэ, Адыгеим икIыгъэ дзэкIолIхэм зэкIэ яунагъохэм социальнэ ыкIи нэмыкI Iофыгъоу яIэхэр зэшIохыгъэ хъунхэм пае къадеIэнхэм иамал агъотыщт. Муниципалитетхэм япащэхэм, ведомствэхэм яIэшъхьэтетхэм пшъэрылъ гъэнэфагъэхэр ащ афишIыгъэх.
«ТынаIэ тетымыгъэтэу зы нэбгыри къэнэщтэп. Хабзэм икъулыкъухэм ямызакъоу, предпринимательхэри, «Единэ Россием» хэтхэри, волонтерхэри, цIыф къызэрыкIохэри ахэм адеIэщтых. ЗэкIэ цIыфхэм афэлъэкIыщтымкIэ яшIуагъэ къагъэкIощт», — къыIуагъ АР-м и ЛIышъхьэ.
Гвардием истаршэ лейтенантэу Валерий Заволянскэм Рязань дэт апшъэрэ дзэ-десант училищыр къыухыгъ. Украинэм щыкIорэ хэушъхьафыкIыгъэ дзэ операцием илъэхъан разведкэм фытегъэпсыхьэгъэ купым ипэщэ IэнатIэ ыгъэцакIэщтыгъ. ЖъоныгъуакIэм и 28-м пыим ипункт къызыхагъэщым, апэуцужьыгъэнымкIэ лIыхъужъныгъэ къызхигъафэзэ, Валерий Заволянскэм пыим ипозициякIэхэр ыгъэунэфыгъэх, IашэкIэ зыщызэпэуцужьыгъэхэ лъэхъаным ар къауIагъ ыкIи ыпсэ хэкIыгъ.
Урысыем и Президентэу Владимир Путиным и УказкIэ идзэ пшъэрылъ ыгъэцакIэ зэхъум лIыхъужъныгъэу ыкIи блэнагъэу зэрихьагъэм апае идунай зихъожьыгъэ нэужым Урысые Федерацием и ЛIыхъужъыцIэ Валерий Заволянскэм къыфагъэшъошагъ.
Спецназым ия 16-рэ бригадэу Тамбов хэкум щыIэм, Валерий Заволянскэм къулыкъур зыщихьыгъэм, промышленнэ-технологическэ колледжэу итым ащ ыцIэкIэ еджагъэх, разведчикым иныбжьыкIэгъу илъэсхэр зыщыкIогъэхэ Хабаровскэ краим ит еджапIэу зычIэсыгъэми джащ фэдэу ыцIэ фаусыгъ. Адыгеим и ЛIышъхьэ къызэрэхигъэщыгъэмкIэ, ЛIыхъужъыр ащымыгъупшэным пае псэупIэу Яблоновскэм, ежь Валерий зыщагъэтIылъыжьыгъэм ыкIи непэкIэ иунагъо зыщыпсэурэм иурамыкIэхэм ащыщ ыцIэкIэ еджэщтых.