Адыгэ Республикэм мэкъу-мэщымкIэ иминистрэу Къуанэ Анзаур къыIотагъ уц гъугъэхэм ягъэстын фемыжьэнхэм пае Iофтхьабзэу зэрахьэхэрэм фэгъэхьыгъэу. Ащ къызэрэхигъэщыгъэмкIэ, илъэсэу икIыгъэм мэкъумэщ мэхьанэ зиIэ чIыгухэм гъогогъу 54-рэ машIом закъыщиштагъ, ахэм япроцент 92-рэ фэдизыр Шэуджэн, Красногвардейскэ, Кощхьэблэ ыкIи Тэхъутэмыкъое районхэм ячIыгухэм къащыхъугъ.
Хыпкъым лыгъэ зэрэрадзырэм къыхэкIэу машIом бэрэ зыкъыштэу мэхъу. Лажьэ зиIэ нэбгырэ 60-мэ административнэ пшъэдэкIыжь арагъэхьыгъ, тазырэу атефагъэр сомэ мин 215-рэ мэхъу.
КъызэрэхагъэщыгъэмкIэ, илъэситIукIэ узэкIэIэбэжьымэ мэкъу-мэщым ихэхъоныгъэ фытегъэпсыхьэгъэ къэралыгъо программэм зэхъокIыныгъэхэр фашIыгъэх. Ащ къызэрэдалъытэрэмкIэ, уцыжъ гъугъэхэр зыгъэстыхэрэм ыкIи ащкIэ пшъэдэкIыжь зэрагъахьыхэрэм къэралыгъом иIэпыIэгъу аIукIэщтэп. Джащ пае илъэсэу икIыгъэм республикэм ичIыгухэм ащыщхэр зыгъэфедэхэрэм компенсацие ыкIи кIэзыгъэгушIухэрэ тынхэр аIэкIагъэхьагъэхэп. Республикэм и ЛIышъхьэ къызэрэхигъэщыгъэмкIэ, чIыпIэхэм пэщэныгъэ адызезыхьэхэрэм мэкъумэщ мэхьанэ зиIэ чIыгухэм машIом закъыщимыштэным пае Iофыгъо гъэнэфагъэхэм ренэу анаIэ атырагъэтын фае.
«ЧIыгур бэджэндэу зылэжьыхэрэм ащ фэдэ лъэныкъохэу къыдалъытэн фаехэр къырамыдзэхэу бэрэ къыхэкIы. Сицыхьэ телъ хабзэу щыIэр ыкIи шапхъэхэр зыукъохэрэм тазыр инхэр атыралъхьэхэу Iофтхьэбзэ пхъашэхэр адызэрахьэхэмэ а лъэныкъомкIэ Iофхэр зыпкъ игъэуцогъэнхэр нахь псынкIэу къызэрадэхъущтым», — къыIуагъ КъумпIыл Мурат.
УФ-м ошIэ-дэмышIэ IофхэмкIэ и Министерствэ Адыгэ РеспубликэмкIэ и ГъэIорышIапIэ ипащэу Станислав Илющенкэм къызэриIуагъэмкIэ, мы илъэсым гъогогъуи 189-рэкIэ машIом зыкъызэриштэрэр нахьыбэ хъугъэу агъэунэфыгъ. Ахэр къызхэкIыхэрэр машIом зэрэфэмысакъыхэрэр, уц гъугъэжъхэр, хэкIыр игъом зэрэIуамыщырэр, чIыопсым изытет икъоу къызэрэдамылъытэрэр ары.
Адыгэ Республикэм мэзхэмкIэ и ГъэIорышIапIэ ипащэу Былымыхьэ Рэщыдэ къызэриIуагъэмкIэ, мы илъэсыр къызихьагъэм къыщыублагъэу мэз фондым щыщэу гектари 0,72-м къыщыкIырэ куандэхэмрэ уцыжъхэмрэ къакIэнагъэу агъэунэфыгъ. Бэджэндэу чIыгур зыштагъэхэмрэ мэзым иIофышIэхэмрэ яшIуагъэкIэ машIор агъэкIосагъ. Мэз фондым зэрар ыхьыгъэп.
Урысыем ошIэ-дэмышIэ IофхэмкIэ и Министерствэ чIыопс мэхьанэ зиIэ машIохэр къэмыгъэхъугъэнхэмкIэ ыкIи ахэр гъэкIосэгъэнхэмкIэ проектэу зэхигъэуцуагъэм епхыгъэу республикэми оперативнэ штабэу ренэу Iоф зышIэщтыр щызэхащагъ. Псыр къыдэмыкIыным лъыплъэщт купэу зэхащагъэм нэбгырэ мини 4-м ехъу хэхьэ (техникэ миным ехъу), чIыопсым епхыгъэ машIохэм афэсакъыщтхэр нэбгырэ мин 1,7-м ехъущт (техникэ 270-рэ).
МашIом зыкъымыштэным лъыплъэнхэм пае ведомствэ куп гъэнэфагъэхэм IофшIэныр зэрищыкIагъэм тетэу зэхащэнэу Адыгеим и ЛIышъхьэ пшъэрылъ афишIыгъ. Уц гъугъэхэр, хэкIыр Iущыгъэнхэм ыкIи ащ дакIоу тапэкIэ машIом зыкъымыштэным пае псэуалъэхэу агъэпсыгъагъэхэр джыри нахь дэгъоу зэтырагъэпсыхьанхэм япхыгъэ пшъэрылъхэр чIыпIэ зыгъэIорышIэжьыным икъулыкъухэм ащ афигъэуцугъэх.
ИкIэухым КъумпIыл Мурат къыхигъэщыгъ шэмбэт шIыхьафхэм язэхэщэн егъэжьэгъэнымкIэ муниципалитетхэм чанэу Iоф зэрашIэрэр. Республикэм и ЛIышъхьэ зэрилъытэрэмкIэ, общественнэ организациехэр, лэжьэкIо коллективхэр къыхагъэлажьэхэзэ а IофшIэным джыри нахь зырагъэушъомбгъун алъэкIыщт. КъэбарлъыгъэIэс амалхэм къыхаутыхэрэм анахь дэгъухэмрэ, анахь дэйхэмрэ ягугъу къащашIын фае.
