Адыгеим и ЛIышъхьэу КъумпIыл Мурат республикэм и Правительствэ зычIэт унэм Адыгеимрэ Пшызэ шъолъыррэ ямуфтиеу Къэрдэнэ Аскэрбый тыгъуасэ зэIукIэгъу щыдыриIагъ.
ЗэIукIэгъум хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Къонэ Заур, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи СМИ-мкIэ и Комитет итхьаматэу Шъхьэлэхъо Аскэр.
БыслъымэнхэмкIэ Бирам мэфэкIышхомрэ НэкIмазэмрэ мэхьанэшхо зэряIэр Адыгеим и ЛIышъхьэ хигъэунэфыкIыгъ.
«Бирам мэфэкIыр къызыщыблагъэрэм ехъулIэу республикэм ис быслъымэнхэм яIофхэр зэпыфэнэу, IофышIоу рахьыжьэхэрэм гъэхъагъэхэр ащашIынэу сафэлъаIо. Ислъам диныр шIум, гукIэгъум, IэпыIэгъу зищыкIагъэхэм афэгумэкIынхэм къафэджэ. Адыгеим ис быслъымэнхэм дин, лъэпкъ зэгурыIоныгъэм игъэпытэн тапэкIи яIахь хашIыхьанэу тэгугъэ. Мы мэфэкI лъапIэм унагъо пэпчъ насыпрэ гушIуагъорэ къафихьынэу сэлъаIо», — къыIуагъ КъумпIыл Мурат.
Бирам мэфэкIэу къэблагъэрэм ихэгъэунэфыкIынкIэ Iофтхьабзэу республикэм щызэрахьащтхэм зэIукIэгъум хэлэжьагъэхэр атегущыIагъэх. Мыгъэ Бирамыр жъоныгъуакIэм и 13-м хагъэунэфыкIыщт, республикэмкIэ ар мэфэкI мафэу щытыщт.
Адыгеимрэ Пшызэ шъолъыррэ ямуфтий республикэм ис быслъымэнхэм яIофыгъохэм язэшIохынкIэ IэпыIэгъу къазэрэфэхъурэм фэшI Адыгеим и ЛIышъхьэ зэрэфэразэр зэIукIэгъум къыщиIуагъ.
Къэрдэнэ Аскэрбый зэрэхигъэунэфыкIыгъэмкIэ, Бирам мэфэкIыр къызыщыблагъэрэм республикэм исхэу гъот макIэ зиIэхэм IэпыIэгъу афэхъущтых.
Пчэдыжьым сыхьатыр 8-м къыщегъэжьагъэу республикэм имэщыт пстэуми Iоф ашIэщт. Мы мафэм Мыекъуапэ дэт мэщытышхом кIэлэцIыкIухэм апае Iофтхьэбзэ зэфэшъхьафхэр щызэрахьащтых, IэшIу-IушIухэмкIэ сабыйхэр агъэгушIощтых.
