Адыгеим и ЛIышъхьэу КъумпIыл Мурат непэ IофшIэгъу зэIукIэгъу дыриIагъ генерал-майорэу Александр Александровым — Урысые Федерацием и Лъэпкъ гвардие идзэхэм явневедомственнэ къэухъумэнкIэ ыкIи лицензионнэ-фитыныгъэ IофшIэным изэхэщэнкIэ Къыблэ округым икомандующэ игуадзэ.
Александр Александровым КъумпIыл Мурат нэIуасэ фишIыгъ Росгвардием Адыгэ РеспубликэмкIэ и ГъэIорышIапIэ пэщакIэу тырагъэхьэгъэ Иван Гричановым. Мы IэнатIэм тетыгъэ Алексей Порвэ нэмыкI шъолъырым къулыкъу щихьынэу агъэкIуагъ. Полицием иполковникэу Иван Гричановыр джынэс Росгвардием Адыгэ РеспубликэмкIэ и ГъэIорышIапIэ ипащэ игуадзэу Iоф ышIагъ.
ЗэIукIэгъум илъэхъан шъолъырым игъэцэкIэкIо хабзэрэ Урысые Федерацием и Лъэпкъ гвардие ичIыпIэ къулыкъурэ Iоф зэрэзэдашIэщтым тегущыIагъэх, анахьэу анаIэ зытырагъэтыщт лъэныкъохэр агъэнэфагъэх.
Александр Александровым Адыгеим и ЛIышъхьэ рэзэныгъэ гущыIэхэр фигъэзагъэх къызэрадэлажьэрэм ыкIи 2016-рэ илъэсым къыщыублагъэу Росгвардием Адыгэ РеспубликэмкIэ и ГъэIорышIапIэу къэралыгъом икъыблэкIэ анахь дэгъухэм ахалъытэрэм изэхэщэн шIуагъэ къытэу къызэрэхэлэжьагъэм апае.
Мэхьанэшхо зиIэ къэралыгъо пшъэрылъхэм язэшIохынкIэ къулыкъу зэфэшъхьафхэм язэдэлэжьэныгъэ апшъэхэм зэращыщыр Адыгеим и ЛIышъхьэ къыхигъэщыгъ.
«Щынэгъончъэным тегъэпсыхьагъэу хэбзэухъумэкIо къулыкъухэм адэлэжьэгъэнымкIэ IофшIэкIэ амалышIухэр тишъолъыр щыгъэфедагъэх. Джырэ охътэ къинэу коронавирусым ищынагъо епхыгъэм Росгвардием иIэпыIэгъу ин зэхэтэшIэ ащ земыгъэушъомбгъугъэным пае Iофыгъоу зетхьэхэрэмкIэ. Шъолъырым иэпидемиологическэ зытет тылъыплъэнымкIэ, сымаджэхэр нахьыбэ къызщыхъурэ чIыпIэхэм зэпахырэ узыр ащылъымыкIотэным пае унашъоу тшIыхэрэр псынкIэу гъэцэкIэгъэнхэмкIэ тизэдэлэжьэныгъэ ишIогъэшхо къэкIо. Сицыхьэ телъ бзэджэшIагъэхэр къэмыгъэхъугъэнхэмкIэ ыкIи тишъолъыр ирэхьатыныгъэ къэухъумэгъэнымкIэ тапэкIи зэдытипшъэрылъхэр зэдэдгъэцэкIэнхэ зэрэтлъэкIыщтым. Адыгеир лъэпкъ зэгурыIоныгъэ, мамырныгъэ ыкIи зыпкъитыныгъэ зэрылъхэ шъолъырэу щытыгъ ыкIи джащ фэдэу къэнэжьын фае», — къыIуагъ КъумпIыл Мурат.
ЧIыпIэ къулыкъум изэхэщэнкIэ ыкIи зэдэлэжьэныгъэм игъэпытэнкIэ Iофэу зэшIуихыгъэм пае Адыгеим и ЛIышъхьэ Алексей Порвэ рэзэныгъэ гущыIэхэр фигъэзагъэх ыкIи республикэм щыIэ чIыпIэ къулыкъум Iэшъхьэтет фашIыгъэмкIэ Росгвардием ипащэхэм адыригъэштагъ. КъумпIыл Мурат ишIошIкIэ, мэхьанэ яI ГъэIорышIапIэм ипащэ шъолъырым зэрэщыпсэурэм, Iофэу ыгъэцакIэрэм хэшIыкI зэрэфыриIэм ыкIи бэшIагъэу ащ зэрэщылажьэрэм. Мы зэкIэми яшIуагъэ къэкIощт ауж къикIыхэрэм яIофшIэкIэ амал хэгъэхъогъэнымкIэ, щысэшIу яIэнымкIэ.
ЗэдэгущыIэгъум илъэхъан Росгвардием Адыгэ РеспубликэмкIэ и ГъэIорышIапIэ ипэщакIэ пшъэрылъхэр фашIыгъэх общественнэ щынэгъончъэным, цIыфхэм яфитыныгъэхэм ыкIи яшъхьафитыныгъэ якъэухъумэнкIэ ГъэIорышIапIэм игъэхъагъэхэм ахэгъэхъогъэнэу.
