Адыгэ Республикэм ипсэупIэхэм газыр зэраIэкIагъэхьащт программэу 2021 — 2025-рэ илъэсхэм ателъытагъэм икIэтхэн фэгъэхьыгъэ Iофтхьабзэр тыгъуасэ видеоконференцие шIыкIэм тетэу зэхащагъ. Адыгеим и ЛIышъхьэу КъумпIыл Муратрэ ПАО-у «Газпромым» и правление итхьаматэу Алексей Миллеррэ а тхылъым аIапэ кIадзэжьыгъ.
Республикэм ипсэупIэхэм газыр аIэкIэгъэхьэгъэнымкIэ Iофтхьабзэу рахъухьагъэхэм мэхьанэшхо зэряIэр КъумпIыл Мурат ипсалъэ къыщыхигъэщыгъ. Адыгэ Республикэм и ЛIышъхьэ къызэриIуагъэмкIэ, республикэм инвестициеу къыхалъхьащтыр зыфэдизыр ыкIи ащ хэхъоныгъэу ышIыщтыр бэкIэ зэлъытыгъэр энергетическэ инфраструктурэм изытет ары. Республикэм ипащэхэм Адыгеим ипсэупIэхэм газыр зэраIэкIахьэрэм лъэшэу гъунэ лъафы. Мы аужырэ илъэс 15-м къыкIоцI ПАО-у «Газпромым» зэдэлэжьэныгъэ дэгъу зэрэдыриIэм къыхэкIэу Адыгеим ипсэупIэхэу чIыопс газыр зыIэкIахьэхэрэм процент 19-кIэ къахэхъуагъ ыкIи процент 87-м ар нэсыгъ.
«Джыдэм пшъэрылъ шъхьаIэу тиIэр псынкIэу республикэм хэхъоныгъэ егъэшIыгъэныр ары. Джащ фэдэу къэралыгъо программэхэм, лъэпкъ проектхэм, Адыгэ Республикэм 2020 — 2024-рэ илъэсхэм социальнэ-экономикэ хэхъоныгъэ зэришIыщт унэе программэм къадыхэлъытэгъэ Iофтхьабзэхэр зэрахьэх. Мы программэм инфраструктурэхэм язытет нахьышIу шIыгъэным тегъэпсыхьэгъэ Iофтхьабзэхэр къыщыдэлъытагъэх. Пшъэрылъэу тапашъхьэ итхэр зэрэзэшIотхыщтхэр, республикэм тапэкIэ хэхъоныгъэ зэришIыщтыр, цIыфхэм ящыIэкIэ-псэукIэ зыкъызэриIэтыщтыр илъэситф благъэм Адыгеим ипсэупIэхэм газыр аIэкIэгъэхьэгъэнымкIэ программэм къыщыдэлъытэгъэ Iофтхьабзэхэр игъом зэрагъэцакIэхэрэм ялъытыгъэщт. Ащ Адыгэ Республикэм иэкономикэ хэхъоныгъэ зэрэригъэшIыщтым, къоджэ псэупIэ цIыкIухэм зызэраригъэушъомбгъущтым, республикэм исхэм ящыIэкIэ-псэукIэ къызэриIэтыщтым сицыхьэ телъ», — къыIуагъ Адыгеим и ЛIышъхьэ.
ПАО-у «Газпромым» и правление итхьаматэу Алексей Миллер компаниемрэ республикэмрэ азыфагу зэпхыныгъэ дэгъу зэрилъыр, тапэкIи ахэм язэдэлэжьэныгъэ зэрэлъагъэкIотэщтым ицыхьэ зэрэтелъыр хигъэунэфыкIыгъ.
«Илъэсыбэ хъугъэ зэдэлэжьэныгъэ дэгъу тазыфагу зилъыр, газыр аIэкIэгъэхьэгъэным тегъэпсыхьэгъэ проектхэр, социальнэ проектхэр зэдэтэгъэцакIэх. Зэрэ Урысыеу пштэмэ, республикэм ипсэупIэхэм газыр зэраIэкIахьэрэмкIэ иIофхэм язытет бэкIэ нахьышIу. Адыгэ Республикэм ипсэупIэхэм газыр аIэкIэгъэхьэгъэным тегъэпсыхьэгъэ программэм пае ахъщэу къэттIупщырэм хэдгъэхъуагъ, 2020-рэ илъэсым пае сомэ миллиони 161-рэ къэттIупщыгъ. 2021 — 2025-рэ илъэсхэм атегъэпсыхьэгъэ программэм игъэцэкIэн «Газпромым» сомэ миллиарди 3-м ехъу пэIуигъэхьащт. Ыпэрэ илъэситфым елъытыгъэмэ, ар фэди 5,9-кIэ нахьыб. 2025-рэ илъэсым ехъулIэу Адыгеим ипсэупIэ пстэуми газыр алъыгъэIэсыгъэным тегъэпсыхьэгъэ Iофтхьабзэхэр тыухыщтых», — къыIуагъ Алексей Миллер.
Шъугу къэтэгъэкIыжьы Адыгэ Республикэм ипсэупIэхэм газыр алъыгъэIэсыгъэным тегъэпсыхьэгъэ программэу 2021 — 2025-рэ илъэсхэм ателъытагъэм къыдыхэлъытагъэу Iофтхьэбзэ 24-рэ зэрэзэрахьащтыр, социальнэ мэхьанэ зиIэ псэолъэ 21-рэ зэрагъэпсыщтыр. Поселкэхэр зэзыпхыщт газрыкIопIэ 15 агъэпсыщт, республикэм ирайони 3-мэ арыт псэупIэ 17-мэ газыр алъыIэсыщт.
