Адыгеим и ЛIышъхьэу КъумпIыл Мурат ПАО-у «Россети Кубань» зыфиIорэм игенеральнэ пащэ ипшъэрылъхэр зыгъэцакIэу Борис Ибзеевым республикэм и Правительствэ зычIэт унэм зэхэсыгъоу щыдыриIагъэр Адыгэ Республикэм иэлектросетевой комплекс хэхъоныгъэ зэрэрагъэшIыщт шIыкIэм фэгъэхьыгъагъ.
Джащ фэдэу зэхэсыгъом хэлэжьагъэх Адыгэ Республикэм и Премьер-министрэ ипшъэрылъхэр зыгъэцакIэу КIэрэщэ Анзаур, республикэм иминистрэхэу экономикэ хэхъоныгъэмрэ псэолъэшIынымрэ япхыгъэ Iофыгъохэм афэгъэзагъэхэр, шъолъыр къэралыгъо эксперт организацием ипащэхэр, ПАО-у «Россети Кубань» идирекцие илIыкIохэр.
КъумпIыл Мурат зэхэсыгъом зэрэщыхигъэунэфыгъэмкIэ, лъэпкъ проектхэмрэ инвестиционнэ политикэмрэ гъэхъагъэ хэлъэу гъэцэкIэгъэнхэм пае энергетическэ отраслэр республикэм щыгъэкIэжьыгъэн фае.
«ЭкономикэмкIэ, социальнэ лъэныкъомкIэ, гъогушIынымкIэ, псэолъэшIынымкIэ пшъэрылъ инхэр зэрэтиIэхэм фэдэу энергетическэ амалышхуи тиIэн фае. Республикэм иэлектросетевой хъызмэт зэпыу имыIэу Iоф ышIэным, джырэ шапхъэхэм ар адиштэным мэхьанэшхо яI», — къыIуагъ КъумпIыл Мурат.
ПАО-у «Россети Кубань» ипащэ зэхэсыгъом къызэрэщыхигъэщыгъэмкIэ, зэрэзэдэлэжьэщтхэмкIэ зэзэгъыныгъэу зэдашIыгъэм къыщыдэлъытэгъэ Iофтхьабзэхэр зэкIэ планым диштэу агъэцакIэх. 2022 — 2023-рэ илъэсхэм Адыгеим иэлектросетевой комплекс хэхъоныгъэ егъэшIыгъэным тегъэпсыхьагъэу сомэ миллиарди 3,8-м ехъу къатIупщынэу рахъухьэ.
«2021-рэ илъэсым къыщегъэжьагъэу электроэнергетикэмкIэ Адыгеим икомпание инвестиционнэ проект 11-мэ адэлажьэ. Ахэм энергокъэкIуапIэхэм къахагъэхъонэу сэгугъэ», — къыIуагъ Борис Эбзеевым.
Шъугу къэтэгъэкIыжьы 2018 — 2019-рэ илъэсхэм агъэкIэжьынэу подстанции 9 зэрагъэнэфэгъагъэр. Ахэр «ИКЕА», «Черемушки», «Энем», «Адыгейская», «Кужорская», «Тульская», «Комбизавод», «Садовая», «Северная» зыфиIорэ подстанциехэр ары. Урысыем и Правительстви Минэнергэми а псэуалъэхэм ягъэкIэжьынкIэ предложениеу къахьыгъэхэм пчъагъэрэ ащатегущыIагъэх.
Компанием ипащэ зэрэхигъэунэфыкIыгъэмкIэ, «Адыгейская», «Кужорская» зыфиIорэ подстанциехэм ягъэкIэжьынкIэ проектхэр агъэцэкIагъэх. Къэнэгъэ подстанции 6-р мыгъэ агъэкIэжьынэу рахъухьэ. «ИКЕА» зыфиIорэ подстанциер джырэ уахътэм диштэу 2023-рэ илъэсым зэтырагъэпсыхьажьынэу щыт.
Тэхъутэмыкъое районым щагъэпсырэ индустриальнэ паркыр токым зэрэпашIэщтым епхыгъэ Iофыгъоми зэхэсыгъом щыхэплъагъэх. Адыгеим социальнэ-экономикэ хэхъоныгъэ зэришIыщт унэе программэм диштэу мы проектым зегъэушъомбгъугъэнымкIэ ПАО-у «Россети» зыфиIорэм зэдэлэжьэныгъэу дыриIэр тапэкIи лъигъэкIотэным республикэр зэрэфэхьазырыр зэхэсыгъом щыхагъэунэфыкIыгъ.
Зэхэсыгъом хэлэжьагъэхэр цIыфхэм ятхьаусыхэ тхылъхэу икъоу электроэнергиер къазэраIэкIамыгъахьэрэм епхыгъэхэм шъхьафэу атегущыIагъэх. Мы Iофыгъор псынкIэу зэшIохыгъэн зэрэфаер республикэм и ЛIышъхьэ хигъэунэфыкIыгъ.
