Терроризмэм пэшIуекIогъэнымкIэ комиссиемрэ Оперативнэ штабымрэ тыгъуасэ яIэгъэ зэхэсыгъом тхьамэтагъор щызэрихьагъ Адыгэ Республикэм и ЛIышъхьэу КъумпIыл Мурат.
Гъэсэныгъэм иорганизациехэм террористическэ актхэр къащымыхъунхэм фэшI ахэр къэухъумэгъэнхэм, непэрэ мафэм ехъулIэу Iофхэм язытет зыфэдэм, ащкIэ Iофтхьэбзэ тедзэхэу зэхащэхэрэм къэзэрэугъоигъэхэр атегущыIагъэх.
КъызэраIуагъэмкIэ, зэкIэмкIи къаухъумэн фэе организациеу республикэм итыр 288-рэ мэхъу. Ахэм зэкIэми щынэгъончъэным ипаспортхэр апалъхьагъэх.
Къэралыгъо программэу «Гъэсэныгъэм ихэхъоныгъ» зыфиIорэм къыдыхэлъытагъэу гъэсэныгъэм иучреждениехэм ящынэгъончъагъэ къэухъумэгъэным фытегъэпсыхьэгъэ Iофтхьабзэхэм язэхэщэн 2020-рэ илъэсым сомэ миллион 12 пэIуагъэхьагъ. Мы илъэсми ащ фэдиз джыри республикэ бюджетым къыхагъэкIыгъ. Непэрэ мафэм ехъулIэу полицием макъэ зэребгъэIущтхэ пкъыгъохэр ыкIи видеокамерэхэр зэкIэ организациехэм ачIагъэуцуагъэх, нэмыкI пшъэрылъхэри зэрифэшъуашэу зэшIуахых.
2020 – 2021-рэ илъэс еджэгъум ипэублэ ехъулIэу Адыгеим иеджапIэхэм психологи 133-мэ Iоф ащашIэ. Ахэр кIэлэеджакIохэм IэпыIэгъу афэхъунхэм фэхьазырых.
Гъэсэныгъэм иучреждениехэм, ахэм ащеджэхэрэм, кIэлэегъаджэхэм ящынэгъончъагъэ къэухъумэгъэным мэхьанэшхо зэриIэр КъумпIыл Мурат къыхигъэщыгъ. Казань къыщыхъугъэ тхьамыкIагъом ыуж къулыкъу ыкIи ведомствэ пстэуми гъэлъэшыгъэу Iоф ашIэн, япшъэрылъхэр шIокI имыIэу агъэцэкIэнхэ зэрэфаер хигъэунэфыкIыгъ.
Радикализмэм зимыушъомбгъуным, зыныбжь имыкъугъэхэр ыкIи ныбжьыкIэхэр ащ щыухъумэгъэнхэм фытегъэпсыхьэгъэхэ пэшIорыгъэшъ Iофтхьабзэхэм язэхэщэн республикэм зэрэщылъыкIуатэрэм къытегущыIагъэх министрэхэу КIэрэщэ Анзаур, Аулъэ Юр, джащ фэдэу АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат. ЩыIэныгъэм къыхафэхэрэ лъэныкъо дэйхэм къыткIэхъухьэхэрэ лIэужхэр ащыухъумэгъэнхэм фэшI анахьэу анаIэ зытырагъэтхэрэ лъэныкъохэм ахэр къащыуцугъэх. Лъэпкъ зэфэшъхьафхэм къахэкIыгъэ ныбжьыкIэхэм язэгурыIоныгъэ, яныбджэгъуныгъэ гъэпытэгъэныр, спортым ыкIи физическэ культурэм апыщагъэхэм япчъагъэ нахьыбэ шIыгъэныр пшъэрылъ шъхьаIэу къагъэнэфагъэх. А лъэныкъохэмкIэ республикэм бэ зэрэщызэшIуахырэр хагъэунэфыкIыгъ.
Хэдзынхэм ялъэхъан цIыфхэм амакъэ зыщатхэрэ чIыпIэхэр терроризмэм ылъэныкъокIэ ухъумэгъэнхэм, мыщкIэ Iофтхьэбзэ тедзэхэр зэхэщэгъэнхэм афэшI шIэгъэн фаехэм къатегущыIагъэх АР-м хэгъэгу кIоцI IофхэмкIэ иминистрэу Иван Бахиловымрэ республикэм хэдзынхэмкIэ и Гупчэ комиссие итхьаматэу Сэмэгу Нурбыйрэ.
Iоныгъом и 19-м УФ-м и Къэралыгъо Думэ ыкIи АР-м и Къэралыгъо Совет — Хасэм идепутатхэр шъолъырым щыхадзыщтых. Джащ фэдэу муниципальнэ мэхьанэ зиIэхэ хэдзынхэри щыIэщтых.
2021-рэ илъэсым щылэ мазэм и 1-м ехъулIэу амакъэ атынымкIэ фитыныгъэ зиIэ 339373-рэ республикэм щатхыгъ. Участковэ комиссие 266-мэ Iоф ашIэщт.
Хабзэ зэрэхъугъэу Адыгеим хэдзынхэр рэхьатэу, щынэгъончъэу щызэхэщэгъэнхэ, мыщкIэ цIыфхэм яфитыныгъэхэр къэухъумэгъэнхэ зэрэфаер республикэм ипащэ хигъэунэфыкIыгъ. Ащ епхыгъэу пшъэрылъ гъэнэфагъэхэр къафишIыгъэх.
Iашэр, щэхэр, къагъэохэрэ пкъыгъохэр хэбзэнчъэу къырамыгъэкIокIынхэм лъыплъэгъэнымкIэ IофшIэныр зэхэщагъэ зэрэхъурэм изэфэхьысыжьхэр къашIыгъэх министрэу Иван Бахиловымрэ Росгвардием АдыгеимкIэ и ГъэIорышIапIэ ипащэу Иван Гричановымрэ.
