Урысые Iофтхьабзэу «Тэ - Урысыем тырицIыф» зыфиIорэм тегъэпсыхьагъэу Адыгэ Республикэм и Къэралыгъо филармоние Адыгеим икIэлэеджэкIуи 10-мэ паспортхэр щаратыжьыгъэх.
Ахэм ахэтых Урысые олимпиадэхэм щатекIуагъэхэр ыкIи творческэ, спортивнэ зэнэкъокъухэм анахь чIыпIэ дэгъухэр ащызыубытыгъэхэр, джащ фэдэу юнармейцэхэр ыкIи волонтер движением анахь чанэу хэлажьэхэрэр.
Адыгеим и ЛIышъхьэу КъумпIыл Мурат къэзэрэугъоигъэхэм шIуфэс къарихызэ хигъэунэфыкIыгъ тикъэралыгъо имэфэкI шъхьаIэхэм зыкIэ ащыщым — Урысыем и Мафэ ар зэрэтефагъэр.
«Урысыем кIуачIэ къезытыхэрэр ащ ицIыфхэр ары, зи Хэгъэгу шIу зылъэгъухэрэр, ащ инепэрэ ыкIи инеущырэ мафэкIэ пшъэдэкIыжь зэрахьырэр къызгурыIохэрэр ары. Гуетыныгъэ фыряIэу я Хэгъэгу ахэр фэлажьэх, тыкъэзыуцухьэрэ дунаим икъэбзагъэ анаIэ тырагъэты, ягупсэхэм, гукIэгъум фэныкъохэм адеIэх. Сэ сицыхьэ телъ Урысыем игражданин шъыпкъэ шъузэрэхъущтым, тэ, нахьыжъхэм, тызэрыгушхощт, шIуагъэ къэзытыщт Iофыбэ зэрэзэшIошъухыщтым», — къыкIигъэтхъыгъ КъумпIыл Мурат.
Республикэм и ЛIышъхьэ къызэриIуагъэмкIэ, хэбзэ къулыкъухэм зэкIэ афэлъэкIыщтыр ашIэ ныбжьыкIэхэм амалэу яIэр нахьыбэ хъунымкIэ, нэбгырэ пэпчъ исэнаущыгъэ нахь къыгъэлъэгъонымкIэ, джащ фэдэу ыгукIэ зыфэщэгъэ сэнэхьатыр къыхихынымкIэ.
Джащ пае федеральнэ къулыкъухэм яIэпыIэгъу хэлъэу гъэсэныгъэмкIэ джырэ уахътэм диштэрэ инфраструктурэр республикэм щагъэпсы, пэрыт шIыкIэ-амалхэр агъэфедэх, научнэ-ушэтын IофшIэныр чаныгъэ хэлъэу лъагъэкIуатэ.
«Илъэс 14-м ехъулIэу еджэнымкIэ, спортымкIэ, творчествэмкIэ ыкIи волонтерствэмкIэ гъэхъагъэхэр зэрэшъуиIэхэр нафэ къэхъугъ. ТекIоныгъэм иIэшIугъэ зэхэшъушIэн шъулъэкIыгъ. КIэ горэм ыуж шъуихьанымкIэ ыкIи ыпэкIэ шъулъыкIотэнымкIэ пэрыохъуныгъэхэм шъуащыщынэрэп. Гъэхъагъэм екIурэ гъогум шъутемыкI, джыри нахьыбэ зэрэзэшIошъухыщтым шъудэлажь. Республикэм тапэкIи хэхъоныгъэ ышIыным пае шIэныгъэ куу зиIэ IофышIэхэр тищыкIагъэх. НахьыжъхэмкIэ кIэгъэкъон дэгъу шъухъун фае, шъуилъэныкъо гупсэ ыпэкIэ зэрэлъыкIотэщтым ренэу шъунаIэ тежъугъэт», — къыхигъэщыгъ Адыгеим и ЛIышъхьэ.
Ащ нэужым Адыгэ Республикэм и ЛIышъхьэ нэбгырэ пэпчъ паспортымрэ «Единэ Россием» ыцIэкIэ шIухьафтынымрэ — планшетымрэ аритыжьыгъэх.