УФ-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и Къэралыгъо инспекцие и ГъэIорышIапIэу АР-м щыIэм иотделэу ушэтынхэм язэхэщэн ыкIи автотранспортым итхын фэгъэзагъэр зычIэтыщт унакIэу ашIыгъэр къызэIуахыгъ.
Ащ фэгъэхьыгъэ Iофтхьабзэм хэлэжьагъэх АР-м и ЛIышъхьэу КъумпIыл Мурат, АР-м хэгъэгу кIоцI IофхэмкIэ иминистрэу Иван Бахиловыр, ГИБДД-кIэ ГъэIорышIапIэм ипащэу Александр Курпас.
УнакIэр ыпэкIэ отделыр зычIэтыгъэ унэм дэжькIэ щашIыгъ. Ар нахь ин, электроннэ шIыкIэм тетэу чэзыум зыхэптхэн амал къэзытырэ системэр иIэ хъугъэ, цIыфхэм Iоф ащыдашIэнэу «шъхьаныгъупчъэхэр» бэу щагъэпсыгъэх, уищыкIэгъэ къэбар пстэур тетхагъэу стендышхо пылъагъ. Автотранспортыр щябгъэтхыным имызакъоу, ушэтынхэм якIуни, автомобилыр бгъэзекIонэу фитыныгъэ къэзытырэ тхылъыр къаIыпхыжьынри джы Iэрыфэгъу хъугъэх.
АР-м и ЛIышъхьэ унакIэр къыплъыхьагъ, цIыфэу къекIолIагъэхэм гущыIэгъу афэхъугъ. Зы мафэм мы отделым Мыекъуапэ ыкIи Мыекъопэ районым ащыпсэухэу, гурытымкIэ лъытагъэу, нэбгыри 150-рэ фэдизмэ яфэIо-фашIэхэр егъэцакIэх. КъумпIыл Муратрэ Иван Бахиловымрэ унакIэм апэу къекIолIагъэхэм ятхылъхэр аратыжьыгъэх.
«УФ-м и Президентэу Владимир Путиным къэралыгъо фэIо-фашIэхэр цIыфхэм зэраIэкIагъахьэхэрэм ылъэныкъокIэ Iофхэр нахьышIу шIыгъэнхэу пшъэрылъ къытфигъэуцугъ. МРЭО-р зычIэтыщт унакIэу къызэIутхыгъэр мыщкIэ зы лъэбэкъушIоу щыт. Автотранспортэу республикэм итыр нахьыбэ зэрэхъурэр, ащ пэпчъ цIыфэу отделым къеуалIэхэрэм япчъагъи зэрэхахъорэр къыдэплъытэхэмэ, ащ мэхьанэ зэриIэр нафэ къэхъу. Къэралыгъом ипащэхэр къыддеIэхэзэ гъогу-хэм язытет нахьышIу хъуным, гъогурыкIоным ишапхъэхэр зыукъохэрэр къыхэгъэщыгъэнхэм тэри тыдэлажьэ», — къыIуагъ КъумпIыл Мурат.
Адыгеим игъогухэр щынэгъончъэнхэр зэкIэ ащ фэгъэзэгъэ ведомствэхэм, къулыкъухэм зэдыряIофэу зэрэщытым республикэм ипащэ къыкIигъэтхъыгъ.
