Адыгеим и ЛIышъхьэу КъумпIыл Мурат Урысыем гъэсэныгъэмкIэ и Министерствэ и Академие ипащэу Сергей Кожевниковым тыгъуасэ зэIукIэгъу дыриIагъ. Республикэм гъэсэныгъэр зэрэщызэхэщагъэм шIуагъэу къытырэм зыкъегъэIэтыгъэным иIофыгъохэм ахэр атегущыIагъэх.
Джащ фэдэу зэIукIэгъум хэлэжьагъэх Адыгэ Республикэм ивице-премьерэу Наталья Широковар, Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур, Урысые Федерацием гъэсэныгъэмкIэ и Министерствэ и Академие шъолъырхэм яхэхъоныгъэкIэ иинститут ипащэу Александр Муратовыр.
ЗэIукIэр къызэIуихызэ Адыгеим и ЛIышъхьэ зэрэхигъэунэфыкIыгъэмкIэ, Академием испециалистхэм республикэм гъэсэныгъэр зэрэщызэхэщагъэм иуплъэкIунэу зэшIуахыгъэм гъэсэныгъэм тапэкIи хэхъоныгъэ зэришIыщтым илъэныкъо гъэунэфыгъэнымкIэ игъэкIотыгъэ еплъыкIэ гъэнэфагъэ къытыщт.
«Лъэпкъ гухэлъхэм къадыхэлъытагъэу Урысыем и Президентэу Владимир Путиным хэгъэгум и Правительствэ ыпашъхьэ пшъэрылъэу къыщигъэуцугъэр зэхэубытэгъэ гъэсэныгъэм ылъэныкъокIэ анахь хэгъэгу дэгъуи 10-мэ ясатыр хэхьэгъэныр ары. Хэгъэгум гъэсэныгъэмкIэ изытет закъоп а Iофыр зэпхыгъэр, цIыфхэм ящыIакIэ нахьышIу шIыгъэнри ащ къыделъытэ. Лъэпкъ проектэу «Гъэсэныгъэм» тегъэпсыхьагъэу федеральнэ проектхэу зэшIуахырэ пстэуми республикэр чанэу ахэлажьэ. Анахьэу анаIэ зытырагъэтырэр гъэсэныгъэм иучреждениехэр мылъку-техникэ лъэныкъомкIэ нахь зэтегъэпсыхьэгъэнхэр, уахътэм диштэрэ шIыкIэ-амал зэфэшъхьафхэмкIэ егъэджэныр зэхэщэгъэныр ары», — къыIуагъ Адыгэ Республикэм и ЛIышъхьэ.
Мыщ дэжьым анахь мэхьанэшхо зэратырэ лъэныкъохэм ащыщых кIэлэегъаджэхэм яIэпэIэсэныгъэ, яшIэныгъэ хэгъэхъогъэныр, егъэджэнымкIэ джырэ екIолIакIэхэр, технологиякIэхэр гъэфедэгъэнхэр. ГущыIэм пае, шъолъырхэм апэ итхэм зыкIэ ащыщэу республикэм къыщызэIуахыгъэх кIэлэегъаджэхэм япрофессиональнэ IэпэIэсэныгъэ зыкъегъэIэтыгъэнымкIэ Гупчэр ыкIи кIэлэегъаджэхэм яшIэныгъэрэ яIэпэIэсэныгъэрэ уасэ афэзышIыщт Гупчэр. Адыгеим икIэлэегъаджэхэм зыкIэ ащыщэу Сергей Левченкэм урысые зэнэкъокъоу «Илъэсым икIэлэегъадж» зыфиIорэм текIоныгъэр къызэрэщыдихыгъэр ащ фэдэ IофшIэным изы шыхьатэу щыт. Хэгъэгум икIэлэегъэджэ анахь дэгъуитфымэ ар ахалъытагъ.
Сергей Кожевниковым къызэрэхигъэщыгъэмкIэ, джырэ уахътэм диштэрэ амалхэр агъэфедэхэзэ IэпэIэсэныгъэ ин зыхэлъ кадрэхэр гъэхьазырыгъэнхэм ылъэныкъокIэ Академиер республикэм къыдэлэжьэным фэхьазыр, къэзытхырэр Адыгэ Республикэм и ЛIышъхьэ ипресс-къулыкъу.
«Урысые Федерацием гъэсэныгъэмкIэ иминистрэу Сергей Кравцовыр Адыгеим зэрэщыIагъэм пыдзагъэу тэри тыкъэкIуагъ. Ащ Москва къызегъэзэжьым къызэрэхигъэщыгъэмкIэ, республикэм IофшIэгъэ гъэшIэгъонхэр щыряIэх, Адыгеим ипащэхэми инфраструктурнэ зэхъокIыныгъэхэм ямызакъоу, зэхэубытэгъэ гъэсэныгъэм шIуагъэу къытырэм зыкъегъэIэтыгъэным анаIэ тырагъэты. Гъэсэныгъэм изытет занкIэу зэпхыгъэр ащкIэ амалэу арагъэгъотыхэрэр ары. Адыгеим а лъэныкъомкIэ тэ тиIофшъэгъухэр тигъусэхэу зэхэфын IофшIэн щыредгъэкIокIыгъ ыкIи пшъэрылъэу дгъэуцугъэхэр гъэцэкIагъэ хъунхэм пае «гъогу картэкIэ» заджэхэрэм игъэпсынкIэ республикэм IэпыIэгъу тыфэхъуным тыфэхьазыр», - къыIуагъ Урысыем гъэсэныгъэмкIэ и Министерствэ и Академие ипащэ.
ЗэдэгущыIэгъум икIэуххэр зэфихьысыжьхэзэ, Адыгэ Республикэм и ЛIышъхьэу КъумпIыл Мурат къызэриIуагъэмкIэ, Академием дыряIэ зэдэлэжьэныгъэм гъэсэныгъэм иIоф лъэгэпIакIэхэм анагъэсынымкIэ кIочIакIэ къызэрахилъхьащтым, къэралыгъом ипащэ къыгъэнэфэгъэ лъэпкъ проектхэм язэшIохынкIи амалышIу зэрэхъущтым ицыхьэ телъ.