Адыгэ Республикэм ахъщэ къуалъхьэм пэшIуекIогъэнымкIэ IофшIэныр щызэхэщэгъэным фэгъэзэгъэ Комиссиеу щылажьэрэм изэхэсыгъоу тыгъуасэ щыIагъэр зэрищагъ Адыгеим и ЛIышъхьэу КъумпIыл Мурат.
Ащ хэлэжьагъэх Къэралыгъо Советым – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Ппремьер-министрэу Геннадий Митрофановыр, АР-м иминистрэхэм я Кабинет хэтхэр, АР-м и Апшъэрэ хьыкум, прокуратурэм, хэгъэгу кIоцI IофхэмкIэ Министерствэм, федеральнэ ыкIи республикэ къулыкъухэм япащэхэр.
Зэхэсыгъом зыщытегущыIагъэхэр ахъщэ къолъхьэ тын-Iыхын нэшанэхэр зиIэ хэбзэукъоныгъэхэр, ахэр къэмыгъэхъугъэнхэмкIэ зэрахьэрэ Iофхэр, чIыпIэ зыгъэIорышIэжьыпIэхэм мы лъэныкъомкIэ якъэбархэр ары.
АР-м хэгъэгу кIоцI IофхэмкIэ и Министерствэ экономическэ щынэгъончъэнымкIэ ыкIи ахъщэ къуалъхьэм ебэныгъэнымкIэ и ГъэIорышIапIэ ипащэу Гъонэжьыкъо Адам къызэриIуагъэмкIэ, ахъщэ къолъхьэ тын-Iыхыным епхыгъэ бзэджэшIэгъэ 59-рэ икIыгъэ илъэсым агъэунэфыгъ, мыхэм ащыщэу 12-р къуалъхьэу аштагъэр бэу ыкIи бэдэдэу.
Ахъщэ къолъхьэ тын-Iыхыныр къэмыгъэхъугъэнымкIэ зэшIуахырэм къытегущыIагъ АР-м и ЛIышъхьэ ахъщэ къуалъхьэ ыкIи нэмыкI хэбзэукъоныгъэхэр къэмыгъэхъугъэнхэмкIэ и ГъэIорышIапIэ ипащэу Алексей Селезневыр. Ащ къыIуагъ организациехэу къяпхыгъэхэм ахъщэ къолъхьэ тын-Iыхыныр къащымыгъэхъугъэным тегъэпсыхьэгъэ шэпхъэ актым ипроект агъэхьазыри экспертизэ арагъэшIыным пае АР-м и ЛIышъхьэрэ АР-м иминистрэхэм я Кабинетрэ я Администрацие хэбзэ гъэIорышIапIэу хэтым зэрагъэхьыгъэр. Аухэсыгъэм тетэу мы илъэсым ГъэIорышIапIэм зэфэхьысыжь фешIы къэралыгъо щыкIагъэхэм апае щэфэнхэр зэшIуахыхэ зыхъукIэ ахъщэ къуалъхьэм чIыпIэ щыримыIэным тегъэпсыхьагъэу ашIэнэу афагъэнэфэгъагъэхэр зэрагъэцакIэхэрэм.
«Ахъщэ къуалъхьэм пэуцужьыгъэным пае IофшIэныр ау сыдми зэшIохыгъэ хъущтэу плъытэнэу щытэп. Къэралыгъом ипащэхэм пшъэрылъ гъэнэфагъэхэу лъэпкъ проектхэмрэ къэралыгъо программэхэмрэ зэшIохыгъэнхэм атегъэпсыхьагъэхэр къытфашIых. Мы лъэныкъохэмкIэ бюджет мылъкур шIуагъэ къытэу гъэфедагъэ зэрэхъурэм непэ гъэлъэшыгъэу тылъыплъэн фае», — къыкIигъэтхъыгъ КъумпIыл Мурат.
Зэхэсыгъом джащ фэдэу щедэIугъэх Джэджэ районым ипащэу Андрей Таранухиным къыгъэхьазырыгъэ къэбарым. Районым ичIыпIэ зыгъэIорышIэжьыпIэхэм ахъщэ къуалъхьэм ебэныгъэным епхыгъэу щызэшIуахыхэрэм ар къатегущыIагъ.
Мы IофыгъомкIэ ыкIи нэмыкI бзэджэшIагъэхэмкIэ пэшIорыгъэшъ IофшIэныр муниципальнэ ыкIи къоджэ псэупIэхэм яадминистрациехэм нахь чанэу ащызэшIуахынэу КъумпIыл Мурат уплъэкIун-лъыплъэкIо къулыкъухэм япащэхэм афигъэпытагъ. Анахьэу анаIэ зытраригъэдзагъэр муниципальнэ IофышIэхэм яфедэхэм, мылъкоу яIэм, ащкIэ япшъэдэкIыжь афэгъэхьыгъэ къэбархэр шъыпкъагъэ хэлъэу къягъэтыгъэнхэр, ашIэ мыхъущтым дэмыхынхэр ары.
