Адыгэ Республикэм и ЛIышъхьэу КъумпIыл Мурат лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытагъэу Мыекъуапэ ирайонэу Черемушкэм хэхьэрэ щагухэм ащыщхэу зэтырагъэпсыхьагъэхэм тыгъуасэ ащыIагъ.
Iофтхьабзэм хэлэжьагъэх Адыгеим и Премьер-министрэ игуадзэу Сапый Вячеслав, АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ ипащэ игуадзэу Лафышъэ Рэмэзан, Мыекъуапэ имэр иIэнатIэ зыгъэцакIэрэ Сергей Стельмах.
Республикэм ипащэ IофшIэнхэр зэрэзэхащагъэр зэригъэлъэгъугъ, мы чIыпIэм къыпэблагъэу щыт фэтэрыбэу зэхэт унэхэм ащыпсэухэрэм, зэзэгъыныгъэр зыгъэцэкIэрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Дортранс» зыфиIорэм ипащэхэм гущыIэгъу афэхъугъ.
КъызэраIуагъэмкIэ, щагухэм язэтегъэпсыхьан къыдыхэлъытагъэу кIэлэцIыкIу площадкэхэр ашIыгъэх, спорт тренажерхэр агъэуцугъэх, хэкIыр зыщыратэкъурэ чIыпIэхэр къашIыхьагъэх, нэмыкIэу зэшIуахыгъэр бэ.
«Непэ пшъэрылъ шъхьаIэу тиIэр шIуагъэ къытэу лъэпкъ проектхэр дгъэцэкIэнхэр ары, ащ хэхьэ щагухэм язэтегъэпсыхьани. Мыщ фэдэ проектхэр дгъэцакIэхэ зыхъукIэ, цIыфхэм яеплъыкIэ зэдгъэшIэн, къыдэтлъытэн фае. Ащ фэдэ екIолIакIэм ишIуагъэкIэ чIыпIэхэм язэтегъэпсыхьан цIыфхэр нахьыбэу къыхэдгъэлэжьэнхэ тлъэкIыщт, ахэм яшIоигъоныгъэхэр къыдэлъытагъэхэ хъущт», - къыхигъэщыгъ КъумпIыл Мурат.
2021-рэ илъэсыр пштэмэ, шъолъыр проектэу «ШэпхъэшIухэм адиштэрэ къэлэ щыIакIэр гъэпсыгъэныр» зыфиIорэм игъэцэкIэн сомэ миллиони 146-рэ пэIуагъэхьащт. А мылъкумкIэ общественнэ чIыпIэ 13-рэ щагу 31-рэ Адыгеим имуниципалитетхэм зэкIэми ащызэтырагъэпсыхьащтых, къытыгъ Адыгэ Республикэм и ЛIышъхьэ ипресс-къулыкъу.
АР-м и ЛIышъхьэ мэрием ипащэхэм ыкIи профильнэ министерствэм пшъэрылъ афишIыгъ щагу площадкэхэм язэтегъэпсыхьан лъагъэкIотэнэу.
