ЖъоныгъуакIэм и 1-м Мыекъуапэ щыкIогъэ демонстрациемрэ митингымрэ нэбгырэ мини 4,5-рэ фэдиз ахэлэжьагъ. Урысыемрэ Адыгеимрэ ябыракъхэр, плакатхэр, шархэр аIыгъхэу, дахэу гъэкIэрэкIагъэхэу къэлэдэсхэр урамэу Краснооктябрьскэм къырыкIуагъэх.
ИскусствэхэмкIэ Адыгэ республикэ колледжэу У. Тхьабысымэм ыцIэ зыхьырэм къыщежьэхи, къэлэ зыгъэпсэфыпIэ паркым ахэр нэсыгъэх. Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат къалэм иурам шъхьаIэ къырыкIуагъэхэм ахэтыгъ. Къэлэ паркым зынэсыхэм, ар республикэм щыпсэухэрэмрэ ихьакIэхэмрэ мэфэкIымкIэ къафэгушIуагъ.
«Непэ тиреспубликэ къиныгъохэр зэпичыхэзэ ыпэкIэ теубытагъэ хэлъэу лъэкIуатэ. Экономикэмрэ социальнэ лъэныкъомрэ дгъэпытэщтых, цIыфхэм ящыIэкIэ-псэукIэ нахьышIу хъуным тыфэгумэкIызэ, тапэкIи зэкIэ амалэу щыIэхэр дгъэфедэщтых. ТызэпэмыIэпчъэным, тызэдэлэжьэным мэхьанэшхо зэриIэр анахьэу къыдгурыIон фае. Тызэгъусэмэ ары ныIэп экономикэми, социальнэ лъэныкъоми гъэхъэгъакIэхэр ащытшIын, тятэхэмрэ тятэжъхэмрэ баиныгъэу къытфагъэнагъэр къэтыухъумэн зытлъэкIыщтыр», — къыIуагъ республикэм ипащэ.
Джащ фэдэу мэфэкI Iофтхьабзэхэм ахэлэжьагъэхэм къафэгушIуагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Мыекъуапэ имэрэу Александр Наролиныр, Урысыем и Общественнэ палатэ хэтэу МэщбэшIэ Исхьакъ, Урысыем и ЛIыхъужъэу Цэй Эдуард, Адыгэ Республикэм ипрофсоюзхэм яфедерацие итхьаматэу Устэ Руслъан.
Мыекъуапэ дэсхэри, ихьакIэхэри къалэмрэ республикэмрэ ятворческэ коллективхэм къатыгъэ мэфэкI концертым еплъыгъэх. Мэфэ реным В. И. Лениным ыцIэкIэ щыт пчэгум кIэлэцIыкIухэр щычэфыгъэх, щыджэгугъэх, къэзытхырэр Адыгэ Республикэм и ЛIышъхьэ ипресс-къулыкъу.
«Краснодар» одержал победу над «Ростовом» 
Москва щызэдыряIэгъэ зэIукIэгъур 
У Брюса Уиллиса родилась дочь 
Боец Бислан Этлешев проведет бой в Германии против Джовани Меллило 
МэфэкI зэхахьэм цIыфыбэ хэлэжьагъ