Адыгэ Республикэм и ЛIышъхьэу ТхьакIущынэ Аслъан къэралыгъо корпорациеу — псэупIэ-коммунальнэ хъызмэтым щыкIорэ зэхъокIыныгъэхэм IэпыIэгъу афэхъугъэнымкIэ фондым игенеральнэ пащэу Константин Цициным тыгъуасэ IофшIэгъу зэIукIэгъу дыриIагъ.
Республикэм игъэцэкIэкIо хэбзэ къулыкъухэмрэ фондымрэ тапэкIэ Iоф зэрэзэдашIэщтым, язэпхыныгъэ агъэпытэным пае шIэгъэн фаехэм пащэхэр атегущыIагъэх. АР-м и ЛIышъхьэ пэублэ псалъэ къышIызэ, къэралыгъо корпорацием ипащэ Адыгеим къызэрэкIуагъэмкIэ, джащ фэдэу псэупIэ-коммунальнэ хъызмэтым епхыгъэ федеральнэ программэхэр республикэм щыгъэцэкIэгъэнхэмкIэ IэпыIэгъу къызэрафэхъурэмкIэ зэрэфэразэхэр риIуагъ.
«Адыгеимрэ фондымрэ зэгурыIоныгъэ азыфагу илъэу Iоф зэдашIэ, псэупIэ-коммунальнэ хъызмэтым епхыгъэ гумэкIыгъохэр дэгъэзыжьыгъэнхэмкIэ шъуишIогъэшхо къытэкIы», - къыIуагъ ТхьакIущынэ Аслъан корпорацием игенеральнэ пащэ зыфигъазэзэ. - ПсэупIэ-коммунальнэ хъызмэтым иIофыгъохэм язэшIохын мэхьанэшхо иI, а лъэныкъом мафэ къэс унаIэ тебгъэтын фае, ащкIэ федеральнэ гупчэр IэпыIэгъу къытфэмыхъоу къыттефэрэр дгъэцэкIэн тлъэкIыщтыгъэп. Мыщ фэIорышIэрэ программэхэр щыIэныгъэм щыпхырыщыгъэнхэм тапэкIи тынаIэ тедгъэтыщт, зэкIэ игъом зэшIотхыщт. Адыгеим ит аварийнэ псэупIэ фондыр щыгъэзыеыжьыгъэныр, къызэхэоныр зышъхьащыт унэхэм арыс цIыфхэр дгъэкощынхэр пшъэрылъ шъхьаI. Зэхэоным ищынагъо зиIэ унэхэм ащыпсэухэрэр гъэкощыгъэнхэмкIэ, фэтэрыбэу зэхэт унэхэм игъэкIотыгъэ гъэцэкIэжьынхэр яшIылIэгъэнымкIэ Адыгеим Iофышхо зэришIагъэр Константин Цициным къыхигъэщыгъ.
Мы лъэныкъомкIэ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтхэмкIэ и Министерствэ Урысыем и КъыблэкIэ анахь дэгъухэм ащыщэу ылъытагъ. — Федеральнэ программэхэм ягъэцэкIэнкIэ республикэм ихэбзэ къулыкъухэм упчIэ афытиIэп, зи хэукъоныгъэ къыхэдгъэщыгъэп. Мы аужырэ илъэси 8-м Адыгеим къикIэу зы дэо тхылъ ныIэп къытIэкIэхьагъэр, а гумэкIыгъори псынкIэу дэгъэзыжьыгъэ хъугъэ, — къыIуагъ К. Цициным.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтхэмкIэ и Министерствэ къызэритырэмкIэ, Адыгеим ипсэупIэ фонд зэкIэмкIи квадратнэ метрэ миллион 11,5-рэ мэхъу, ащ щыщэу миллиони 3,3-р фэтэрыбэу зэхэт унэхэм ателъытагъ.
Къатыбэу зэтет псэупIэхэм игъэкIотыгъэ гъэцэкIэжьынхэр яшIылIэгъэным ипрограммэу 2008 — 2015-рэ илъэсхэм ателъытагъэм фэтэрыбэу зэхэт унэ 827-рэ хэлэжьагъ.
ПсэупIэ-коммунальнэ хъызмэтым щыкIорэ зэхъокIыныгъэхэм IэпыIэгъу афэхъугъэнымкIэ фондым зэрифэшъуашэу Iоф зэрэдашIагъэм ишIуагъэкIэ гъэцэкIэжьынхэм апэIухьащт сомэ миллиардым ехъу республикэм къыIэкIэхьагъ. Бюджет зэфэшъхьафхэм къахэхыгъэ сомэ миллиард 1,46-рэ гъэфедагъэ хъугъэ.
Ащ ишIуагъэкIэ фэтэрыбэу зэхэт унэхэм япроцент 54-рэ игъэкIотыгъэу агъэцэкIэжьыгъэх. Къызэхэоным ищынагъо зышъхьащыт унэхэм ачIэсхэр гъэкощыгъэнхэмкIэ щыIэ программэр Адыгеим зэрифэшъуашэу щагъэцакIэ. Ащ къыдыхэлъытагъэу джырэ уахътэм ехъулIэу нэбгырэ 1131-рэ е унэгъо 393-рэ агъэкощыгъах, аварийнэ псэупIэ фондым квадратнэ метрэ мин 16,7-рэ хагъэкIыгъ, фэтэрыбэу зэхэт уни 7 ашIыгъ.
Программэм игъэцэкIэн зэкIэмкIи сомэ миллион 370,3-рэ пэIуагъэхьагъ. Ащ щыщэу сомэ миллион 236,7-р — псэупIэ-коммунальнэ хъызмэтым щыкIорэ зэхъокIыныгъэхэм IэпыIэгъу афэхъугъэнымкIэ фондым, сомэ миллиони 124,2-р республикэм изэхэугъоегъэ бюджет къатIупщыгъэх. ЫпшъэкIэ зигугъу къэтшIыгъэ программэм игъэцэкIэн 2013 — 2017-рэ илъэсхэм ателъытагъ. 2015 — 2016-рэ илъэсхэм яедзыгъо къыдыхэлъытагъэу фирмэу «Компаньон» зыфиIорэм фэтэр 92-у зэхэт унэ поселкэу Яблоновскэм щешIы. Илъэсэу тызхэтым ыкIэм нэс унэгъо 71-мэ ащыпсэурэ нэбгыри 148-рэ а унэм агъэкощыщтых.
Къызэхэон зылъэкIыщт псэупIэ фондэу щыIэр щыгъэзыежьыгъэным пае 2017-рэ илъэсым Iоныгъом и 1-м ехъулIэу унэгъуи 176-мэ арыс нэбгырэ 383-рэ агъэкощынэу агъэнафэ. Ащ игъэцэкIэн зэкIэмкIи сомэ миллиони 144,9-рэ тефэщт.
КъумпIыл Мурат: «Проектхэр гъэцэкIэгъэнхэр пшъэрылъ шъхьаI» 
Пшъэрылъ шъхьаIэхэр афигъэнэфагъэх 
Километрэ 37-рэ фэдиз зикIыхьэгъэщт дамбэхэр ашIыщтых 
Программэр анахь дэгъоу зыгъэцэкIэрэ шъолъырхэм Адыгеир ащыщ 
Зэфэхьысыжьхэм пшъэрылъхэр къакIэлъэкIох