Адыгэ Республикэм и ЛIышъхьэу ТхьакIущынэ Аслъан тын лъапIэхэмрэ щытхъуцIэхэмрэ зыфагъэшъошагъэхэм ар къэзыушыхьатрэ бгъэхалъхьэхэмрэ тхылъхэмрэ аритыжьыгъэх.
Адыгеим иэкономикэ хэхъоныгъэхэр ышIынхэм зиIахьышIу хэзышIыхьагъэхэм яIофшIагъэ осэшIу фишIыгъ, мыщ фэдэ цIыфхэр республикэм зэриIэхэм урыгушхонэу зэрэщытыр къыхигъэщыгъ.
«ШъуиIофшIагъэхэмкIэ, шъуишIэныгъэхэмкIэ, сэнаущыгъэу шъухэлъымкIэ мы тынхэр, щытхъуцIэхэр къэжъулэжьыгъэх. Непэ мы Iофтхьабзэм къекIолIэгъэ нэбгырэ пэпчъ зыфэгъэзэгъэ лъэныкъом гъэхъэгъэшIухэр щыриIэх, ащ тырэгушхо. Кризисым емылъытыгъэу республикэм хэхъоныгъэхэр ешIых ыкIи УрысыемкIэ пэрытхэм тащыщ. Мы аужырэ илъэсхэм объектыкIэ 344-рэ тшIын тлъэкIыгъэ, ахэм ащыщых гурыт еджапIэхэр, кIэлэцIыкIу IыгъыпIэхэр, сымэджэщхэр, фельдшер-мамыку пунктхэр. Джыри тшIэнэу макIэп щыIэр. Непэ Адыгеим ышIырэ гъэхъагъэхэр шъощ фэдэ цIыфхэр ары зэпхыгъэхэр, ащкIэ тышъуфэраз», - къыIуагъ ТхьакIущынэ Аслъан.
АР-м ыпашъхьэ гъэхъэгъэ ин дэдэу щыряIэхэм ыкIи илъэсыбэ хъугъэу Iоф зэрашIэрэм апае медалэу «Адыгеим и Щытхъузехь» зыфиIорэр филологие шIэныгъэхэмкIэ докторэу, АКъУ-м бзэшIэныгъэхэмкIэ икафедрэ ипрофессорэу Абрэдж Ачэрдан, зыныбжь хэкIотагъэхэр ыкIи сэкъатхэр зыщаIыгъ республикэ унэ-интернатым ипащэу Бэгъушъэ Юныс, зипсауныгъэкIэ илэгъухэм акIэмыхьэрэ кIэлэцIыкIухэм апае Реабилитационнэ гупчэу «Звездный» зыфиIорэм ипащэу Гъыщ Рэмэзанэ, муниципальнэ образованиеу «Адыгэкъалэ» инароднэ депутатхэм я Совет итхьаматэу ЛIыхэсэ Юсыф ыкIи пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мамруко» зыфиIорэм ипащэу Мамрыкъо Руслъанэ ТхьакIущынэ Аслъан аритыжьыгъ, къэзытхырэр «Адыгэ Макъ».
Наукэм ихэхъоныгъэ иIахь зэрэхишIыхьагъэм пае щытхъуцIэу «АР-м наукэмкIэ изаслуженнэ IофышIэшху» зыфиIорэр мэкъумэщ шIэныгъэхэмкIэ докторэу, профессорэу, Мыекъопэ къэралыгъо технологическэ университетым мэкъумэщ продукцием итехнологиекIэ икафедрэ ипащэу Ирина Бандуркам АР-м и ЛIышъхьэ фигъэшъошагъ.
Гъэсэныгъэм ылъэныкъокIэ гъэхъагъэхэр зэряIэхэм фэшI щытхъуцIэу «АР-м народнэ гъэсэныгъэмкIэ изаслуженнэ IофышI» зыфиIорэр профессиональнэ-техническэ гъэсэныгъэмкIэ ветеранхэу Олег Абрикосовым, Тамара Василиади, Даур Руслъанэ, Раиса Игумновам, НэмытIэкъо Розэ, Валентина Ракитянскэм, Шъыжъ Хьамедэ, КIыкIхэу Мэджыдэрэ Светланэрэ афигъэшъошагъ.