Адыгэ лъэпкъым итхэкIошхоу МэщбэшIэ Исхьакъ къызыхъугъэр илъэс 85-рэ зэрэхъугъэм фэгъэхьыгъэ мэфэкI зэхахьэу АР-м и Къэралыгъо филармоние щыкIуагъэм цIыфыбэ къекIолIагъ.
Ахэм ахэтыгъэх Адыгэ Республикэм и ЛIышъхьэу ТхьакIущынэ Аслъан, Адыгеим иапэрэ Президентэу Джарымэ Аслъан, АР-м и Къэралыгъо Совет-Хасэм и Тхьаматэу Владимир Нарожнэр, федеральнэ инспектор шъхьаIэу ЛIыIужъу Адам, Къэбэртэе-Бэлъкъарым, Абхъазым, Ингушетием, Темыр Осетием, Краснодар краим, Чэчэным, нэмыкI чIыпIэхэм къарыкIыгъэ лIыкIо купхэр, республикэм имуниципальнэ образованиехэм къарыкIыгъэхэр, нэмыкIхэри.
Цивилизацием хэхъоныгъэ зыщишIырэ лъэхъанхэм ежь иакъылкIэ, ишэнкIэ, ишIоигъоныгъэкIэ чIыпIэ гъэнэфагъэ щызыубытырэ цIыфхэр тарихъым хэтых. Ахэм афэдэ цIыфхэм щыIэныгъэм мэхьанэшхо зэрэщыряIэр уахътэм къегъэлъагъо. Мы гущыIэхэр зэкIэ фэгъэхьыгъ Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу, СССР-м, РСФСР-м ыкIи Адыгеим якъэралыгъо премиехэр къызфагъэшъошагъэу, М. Шолоховым ыцIэкIэ щыт шIухьафтыныр къызэратыгъэ титхакIоу, сэнаущыгъэшхо зыхэлъ МэщбэшIэ Исхьакъ.
АР-м и ЛIышъхьэ зэхахьэм пэублэ псалъэ къыщишIызэ, къызыхъугъэ мафэр хэзгъэунэфыкIырэ И.МэщбашIэм фэгушIуагъ.
«Илъэс пчъагъэхэм ателъытэгъэ уитворческэ IофшIэн адыгэхэм язекIуакIэ къызэрэщызэIупхыгъэм дакIоу, этносым тарихъ гъогоу къыкIугъэр къипIотыкIын, лIэшIэгъу пчъагъэхэм лъэпкъыр зыхэфэгъэ хъугъэ — шIагъэхэр нэм къыкIэбгъэуцонхэ плъэкIыгъ», — къыIуагъ ТхьакIущынэ Аслъан тхэкIошхом зыфигъазэзэ. — О ыкIи уитхылъхэм яшIуагъэкIэ адыгэхэм яшэн-хабзэхэр, язэхэтыкIэ зыфэдэм дунаим щыпсэурэ цIыф миллион пчъагъэр щыгъозагъ. Уироманхэм блэкIыгъэмрэ непэрэ уахътэмрэ язэпхыныгъэ дэгъоу ащыолъэгъу.
Произведениеу уиIэхэм, ахэр тIокIыплIым ехъу, лъэпкъым тарихъ гъогу мыпсынкIэу къыкIугъэр къагъэлъагъо, ахэр зэпхыгъэхэр лIэшIэгъу зэфэшъхьафхэми, зэикI гупшысэ-художественнэ структурэ яI.
Уироманхэм ягерой шъхьаIэхэм ащыщхэу Хъан-Джэрые, графинеу Айщэт, Занэкъо Сэфэрбый, нэмыкIхэм яобразхэр къызэрэбгъэлъэгъуагъэхэр цIыфхэм ашIогъэшIэгъон.
Уилъэпкъ уфэшъыпкъэным, цIыфыныгъэ пхэлъыным ахэм уфапIу. Лъэпкъ ыкIи отечественнэ литературэм хэхъоныгъэхэр ашIынхэм Iоф зэрэдишIагъэм дакIоу, республикэм и Къэралыгъо гимн итекст иавторэу зэрэщытымкIэ И. МэщбашIэр Адыгеим итарихъ къызэрэхэнэжьыщтыр АР-м и ЛIышъхьэ къыхигъэщыгъ. ТхэкIошхом иусэхэм атехыгъэ орэд пчъагъэ зэраусыгъэм, ахэр цIыфхэм агу зэрэрихьырэр кIигъэтхъыгъ.
Илъэс пчъагъэ хъугъэу Исхьакъ Адыгеим итхакIохэм яправление итхьаматэу Iоф ешIэ, сэнаущыгъэ зыхэлъ ныбжьыкIэхэм зыкъызэIуахынымкIэ ишIуагъэ арегъэкIы. Джащ фэдэу лъэпкъ ыкIи дин зэфэшъхьафхэр зылэжьырэ цIыфхэм азыфагу илъ зэгурыIоныгъэр гъэпытэгъэным иIахьышхо хэлъ. А пстэуми мэхьанэшхо зэряIэр АР-м и ЛIышъхьэ къыIуагъ, тхакIом «тхьауегъэпсэу» риIуагъ.
ТхэкIо цIэрыIом творческэ гъогоу къыкIугъэм, игъэхъагъэхэм, игупшысэхэм афэгъэхьыгъэ фильмэу телерадиокомпаниеу «Адыгеим» къыгъэхьазырыгъэм къэзэрэугъоигъэхэр ягуапэу еплъыгъэх. МэфэкI зэхахьэм къыщыгущыIагъэх ыкIи юбилярым къыфэгушIуагъэх Владимир Нарожнэр, ЛIыIужъу Адам, гъунэгъу шъолъырхэм къарыкIыгъэ лIыкIохэр.
Краснодар краим игубернатор унашъоу ышIыгъэм диштэу И. МэщбашIэр къызщыхъугъэ чIыпIэм ибюст щыфагъэуцунэу агъэнэфагъ. Джащ фэдэу Къэбэртэе-Бэлъкъар Республикэм и Щытхъу тхылъ къыфагъэшъошагъ.
АР-м и ЛIышъхьэ наградэхэр къаритыжьыгъэх (21.10.2016) 
МэфэкI зэхахьэм цIыфыбэ хэлэжьагъ 
Пытагъэ хэлъэу къекIолIэщтых 
«Единэ Россиер» апэ ит 
Нахьыжъхэм медальхэр афигъэшъошагъ