Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат къохэм африканскэ емынэр, щагубзыухэм гриппыр ыкIи былымхэм зэпахырэ кIышъо узхэр къямыгъэутэлIэгъэнхэм иамалхэр нахьыбэу зэрахьанэу пшъэрылъ афишIыгъ.
Ащ тегъэпсыхьагъэу Адыгэ Республикэм мэкъу-мэщымкIэ иминистрэу Юрий Петровым республикэм икомиссиеу псэушъхьэхэм зэпахырэ узхэр къямыгъэутэлIэгъэным фэгъэзагъэм изэхэсыгъо зэхищагъ.
Адыгэ Республикэм ветеринариемкIэ и ГъэIорышIапIэ ипащэу ХъокIон Аминэ, Россельхознадзорым Краснодар краимкIэ ыкIи Адыгэ РеспубликэмкIэ и ГъэIорышIапIэ и Адыгэ район къутамэ ипащэу Юрий Шумаковыр, республикэм иминистерствэхэмрэ иведомствэхэмрэ ялIыкIохэр ащ хэлэжьагъэх.
Республикэ ветеринар къулыкъум къызэритыгъэмкIэ, къохэм африканскэ емынэр къямыгъэутэлIэгъэнымкIэ хэгъэгум Iофхэр щыхьылъэх. 2017-рэ илъэсым жъоныгъуакIэм и 15-м ехъулIэу Урысые Федерацием ащ фэдэ узыр къяутэлIагъэу мэзыкъуи 9 къыщыхагъэщыгъ. Московскэ хэкум, Къырым ичIыпIи 6-мэ карантин ащагъэуцугъ унагъохэм ащаIыгъ къохэм ащ фэдэ узыр къяутэлIагъэу зэрагъэунэфыгъэм фэшI. Ащ нэмыкIэу мэзыкъо 25-мэ африканскэ емынэр къазэрахагъэщыгъэм епхыгъэу карантин агъэуцугъ, къэзытхырэр Адыгэ Республикэм и ЛIышъхьэ ипресс-къулыкъу.
ХъокIон Аминэ къызэриIуагъэмкIэ, Адыгэ Республикэм ветеринариемкIэ и ГъэIорышIапIэ къохъуным пылъ предприятиехэр зиехэми, унэе IэпыIэгъу хъызмэтхэр зиIэхэми адэгущыIэ, былымхэм узыр къямыутэлIэнымкIэ ищыкIагъэхэр къафаIуатэх. Къохэр зыфыкъохэкIэ, къахахыгъэ пробэхэр специалистхэм ветеринар лабораторием арагъэхьых. Илъэсыр къызихьагъэм къыщегъэжьагъэу ащ фэдэ пробэ 400-м ехъу ахахыгъ.
Ащ нэмыкIэу къохэм емынэр, кIышъо узхэр къямыгъэутэлIэгъэнхэмкIэ вакцинэхэр ахалъхьэх. Хабзэм димыштэу къо псаухэмрэ къолымрэ амыщэнхэм гъунэ лъафы. Щагубзыухэм къяутэлIэрэ гриппым земыгъэушъомбгъугъэным иамалхэри зэрахьэх. ГущыIэм пае, 2017-рэ илъэсым хэгъэгум ичIыпIи 6-мэ ащ фэдэ узым закъыщиштагъэу агъэунэфыгъ.
Урысыем ишъолъыр 16-мэ гъэрекIо былым пIашъэхэм кIышъо узхэр къащяутэлIэгъагъэх. Мыгъэ ащ фэдэ узхэр былымхэм къямыгъэутэлIэгъэнхэм иамалхэр зэрахьэх. ЫпшъэкIэ зигугъу къэтшIыгъэ комиссием хэтхэм псэушъхьэхэм уз щынагъохэр Адыгеим къыщямыгъэутэлIэгъэнхэм тегъэпсыхьэгъэ Iофтхьэбзэ тедзэу зэрахьащтхэр зэхэсыгъом къыщыхахыгъэх.
ТхьакIущынэ Аслъан адыригъэштагъ 
Гъогоу Мыекъуапэ — Армавир щыщ километри 10-р агъэцэкIэжьыщт 
Зигъо Iофыгъохэм атегущыIагъэх 
Адыгеим и ЛIышъхьэ республикэм щыпсэухэрэм яупчIэхэм джэуапхэр къаритыжьыгъ 
Ягуапэу ямылъку къахалъхьэ