82

ЛIыхъужъныгъэм иорден ритыжьыгъ

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат правительствэм и Унэ щыригъэблэгъагъ Людмила Осиповар — зидунай зыхъожьыгъэ рядовоеу, ЛIыхъужъныгъэм иорден къызыфагъэшъошэгъэ Александр Осиповым янэ.

Александр Осиповыр станицэу Джаджэм къыщыхъугъ. 1999-рэ илъэсым дэгъу дэдэу Мыекъопэ политехническэ колледжыр къыухыгъ. Чэчэн Республикэм къулыкъур щихьыгъ, шхончаоу щытыгъ. 2000-рэ илъэсым щылэ мазэм офицерэу къауIагъэр заом къыхихыжьыгъ, ащ нэужым иныбджэгъоу къауIагъэр къыхихыжьынэу зегъэзэжьым зыдэхъугъэр амышIэу кIодыгъэ. Адыгэ Республикэм и Джэджэ район ихьыкум ышIыгъэ унашъом тетэу 2005-рэ илъэсым щылэ мазэм и 27-м къыщегъэжьагъэу щымыIэжькIэ ар алъытагъ. Урысыем и Президент и УказкIэ зидунай зыхъожьыгъэм ЛIыхъужъныгъэм иорден къыфагъэшъошагъ.

КъумпIыл Мурат Людмила Осиповам фэтхьаусыхагъ ыкIи ыкъо къыфагъэшъошэгъэ наградэр ритыжьыгъ, къэзытхырэр АР-м и ЛIышъхьэ ипресс-къулыкъу.

«Къинэу къыпфыкъокIыгъэр къыбдэтэгощы, ау мы илъэсхэм о ппэкIэкIыгъэм нахьыбэ къин зыми ылъэгъугъэп. Уигууз-лыуз тIэкIу нэмыIэми къыкIезгъэчын зылъэкIыщт гущыIэхэр къытфэгъотыхэрэп. О пкъо лIыхъужъныгъэу зэрихьагъэр тын лъапIэмкIэ хагъэунэфыкIыгъ ыкIи тэ тфэлъэкIыщтыр зэкIэ тшIэщт къызщыхъугъэ чIыпIэм щыпсэухэрэм шIукIэ ар агу къинэным пае», — къыIуагъ КъумпIыл Мурат.

Ежьыми, ыкъуи афэгъэхьыгъэ гущыIэ фабэу къаIуагъэхэм апае лъэшэу зэрафэразэр Людмила Осиповам икIэухым къыIуагъ.

Смотрите также:

Оставить комментарий (0)

Также вам может быть интересно

Загрузка...

Топ 5 читаемых

Самое интересное в регионах