Урысые Федерацием и Къэралыгъо Думэ идепутатэу, партиеу «Единэ Россием» илIыкIоу Владислав Резник шъолъырым хэхъоныгъэ ышIыным иунэе программэрэ федеральнэ къэралыгъо программэмрэ къадыхэлъытагъэу Мыекъуапэ щашIыгъэ псэуалъэхэм ащыIагъ.
Апэрэ чIыпIэу ар зэкIолIагъэр медицинэ гупчакIэу агъэпсыгъэр ары. Къатыбэу зэтет унэм къыщызэIуахыгъэх медицинэ реабилитацием и Адыгэ республикэ гупчэрэ цэхэм зыщяIазэхэрэ поликлиникэмрэ. Ащ зэкIэмкIи сомэ миллион 227,5-рэ пэIуагъэхьагъ.
Владислав Резник АР-м псауныгъэр къэухъумэгъэнымкIэ иминистрэу Мэрэтыкъо Рустем игъусэу псэуалъэр зэрэзэтырагъэпсыхьагъэр зэригъэлъэгъугъ.
Цэхэм зыщяIазэхэрэ поликлиникэу нахьыжъхэм ыкIи кIэлэцIыкIухэм ателъытагъэм мафэм нэбгырэ 1000 къекIолIэн алъэкIыщт. Ащ пае врачебнэ кабинет 45-рэ, рентген-кабинет, лабораториер агъэпсыгъэх.
Медицинэ реабилитацием и Адыгэ республикэ гупчэ мафэм къыкIоцI кIэлэцIыкIу 40 ыкIи нахьыжъи 120-рэ ыштэнхэ, ахэм яфэIо-фашIэхэр афигъэцэкIэнхэ амал иI.
УФ-м и Къэралыгъо Думэ идепутат медицинэм иIофышIэхэм ыкIи учреждением къеолIэгъэ цIыфхэм гущыIэгъу афэхъугъ, гупчэм амалэу IэкIэлъхэр зэригъэшIагъ. УФ-м и Президентэу Владимир Путиным иунашъохэм адиштэу медикхэм къатефэрэ лэжьапкIэр икъоу аIэкIэгъэхьэгъэн зэрэфаер Владислав Резник хигъэунэфыкIыгъ.
«Республикэм хэхъоныгъэхэр зэришIыхэрэр тигуапэ. Ар псауныгъэр къэухъумэгъэным, гъэсэныгъэм, социальнэ лъэныкъом афэгъэхьыгъ. Мы пстэумкIи къэралыгъом ипащэхэр шъолъырым IэпыIэгъу къыфэхъух. Амалэу щыIэ хъугъэхэр дгъэфедэнхэр ары джы тэ типшъэрылъ шъхьаIэр», - къыIуагъ Владислав Резник.
Нэужым депутатыр Мыекъопэ кIэлэцIыкIу поликлиникэм екIолIагъ. Адыгеим хэхъоныгъэ ышIыным фытегъэпсыхьэгъэ унэе программэм ишIуагъэкIэ мы псэолъакIэр ашIыгъ. Ащ сомэ миллиони 180-рэ тефагъ.
Аужырэ чIыпIэу зэкIолIагъэхэр Мыекъопэ къэлэ клиническэ сымэджэщыр ары. БлэкIыгъэ илъэсым мыщ гъэцэкIэжьын инхэр щаухыгъэх. Къэралыгъо программэу «Псауныгъэр къэухъумэгъэным хэхъоныгъэ ышIыныр» зыфиIорэм ишIуагъэкIэ пшъэрылъыр гъэцэкIагъэ хъугъэ. Мы программэм Адыгеир хагъэхьанымкIэ Владислав Резник Iофышхо ышIагъ. Федеральнэ ыкIи республикэ бюджетхэм къахэхыгъэ сомэ миллион 215-рэ фэдиз гъэцэкIэжьынхэм апэIуагъэхьагъ.
Адыгеим и ЛIышъхьэу КъумпIыл Мурат пчъагъэрэ къыхигъэщыгъ пандемием илъэхъан республикэм ахъщэ тедзэ къыIэкIэхьанымкIэ Владислав Резник ишIогъэшхо къызэригъэкIуагъэр. 2020-рэ илъэсым мэлылъфэгъум щегъэжьагъэу финанс IэпыIэгъу тедзэу шъолъырым къыфыхагъэкIыгъэр сомэ миллиарди 6,8-рэ мэхъу. Мы илъэсыр къызихьагъэм щегъэжьагъэу джыри сомэ миллиарди 4 фэдиз къыфатIупщыгъ. Мылъкур лъэныкъо зэфэшъхьафхэм апэIуагъэхьагъ, къэзытхырэр АР-м и ЛIышъхьэ ипресс-къулыкъу.
