Промышленнэ продукциер хэбзэнчъэу гъэзекIогъэным пэуцужьырэ комиссиеу республикэм щызэхащагъэм тыгъуасэ иIэгъэ зэхэсыгъом тхьамэтагъор щызэрихьагъ Адыгэ Республикэм и ЛIышъхьэу ТхьакIущынэ Аслъан.
Iофтхьабзэм хэлэжьагъэх АР-м и Къэралыгъо Совет - Хасэм и Тхьаматэу Владимир Нарожнэр, республикэм ипрокурор шъхьаIэу Василий Пословскэр, муниципальнэ образованиехэм, къулыкъу ыкIи ведомствэ зэфэшъхьафхэм япащэхэр, нэмыкIхэри.
Шъон пытэхэр хэбзэнчъэу зэрэIуагъэкIырэм ылъэныкъокIэ Iофхэм язытет зыфэдэм къытегущыIагъ АР-м хэгъэгу кIоцI IофхэмкIэ иминистрэ игуадзэу БрантI Мурадинэ. Ащ къызэриIуагъэмкIэ, 2015-рэ илъэсым мы Iофыгъом епхыгъэ материал 253-рэ хэбзэухъумакIохэм къаIэкIэхьагъ. Лицензие ямыIэу алкоголь продукциер зыщэщтыгъэхэм алъэныкъокIэ протокол 215-рэ зэхагъэуцуагъ, хэбзэгъэуцугъэр зыукъогъэ нэбгырэ 213-мэ административнэ пшъэдэкIыжь арагъэхьыгъ.
Документ зыпымылъ шъон пытэхэр, этиловэ спиртыр къезыщэкIыщтыгъэ автомобиль 22-рэ гъогу-патруль къулыкъум иIофышIэхэм къагъэуцугъэх. Законыр зыукъуагъэхэм алъэныкъокIэ уголовнэ Iофи 2 къызэIуахыгъ.
Зэфэхьысыжьхэм къызэрагъэлъагъорэмкIэ, аркъ нэпцIыр нахьыбэрэмкIэ къыздыращыхэу агъэунэфыгъэр Темыр Осетиемрэ Къэбэртэе-Бэлъкъар Республикэмрэ. Хэбзэгъэуцугъэр зымыгъэцакIэхэрэр къыхэгъэщыгъэнхэм фэIорышIэрэ Iофтхьабзэхэр хэбзэухъумакIохэм илъэсым къыкIоцI рагъэкIокIыгъэх. Ащ ишIуагъэкIэ шапхъэхэм адимыштэрэ алкоголь продукциер зэрыт бэшэрэб 5798-рэ, спирт литрэ 862-рэ аIахыгъэх, къэзыIорэр «Адыгэ Макъ».
Мы илъэсым, щылэ мазэм, полицием икъулыкъушIэхэм Мыекъопэ районым профилактическэ Iофтхьабзэхэр щырагъэкIокIызэ, автомобилэу «Нисан» зыфиIорэм ируль кIэрысыгъэ водителыр къагъэуцугъ.
Автотранспортыр къызалъыхъум, спиртыр зэрыт бэшэрэб 1160-рэ къырагъотагъ, ахэм зи тхылъ апылъыгъэп. Ащ нэмыкIэу фэтэрхэм, унэхэм аркъ нэпцIыр ащызыщэрэ нэбгырэ пчъагъэ къаубытыгъ, ахэм атефэрэ пшъэдэкIыжьыр арагъэхьыгъ.
Мы лъэныкъомкIэ хэбзэухъумакIохэм Iофышхо ашIэ нахь мышIэми, джыри гумэкIыгъоу, щыкIагъэу щыIэр зэрэбэр министрэм игуадзэ къыIуагъ, ахэр дэгъэзыжьыгъэнхэм анаIэ тырагъэтыщтэу къыгъэнэфагъ. Iэзэгъу уцхэр ыкIи медицинэ пкъыгъохэр хэбзэнчъэу амыгъэзекIонхэм зэрэлъыплъэхэрэм, мы лъэныкъомкIэ мы уахътэм Iофхэм язытет зыфэдэм фэгъэхьыгъэу къэгущыIагъ Росздравнадзорым икъутамэу республикэм щыIэм ипащэу Шымгъэхъу Айтэч.
Ащ къызэрэхигъэщыгъэмкIэ, псауныгъэр къэухъумэгъэным иучреждениехэу, аптекэхэу Адыгеим итхэм ачIэлъ ыкIи ащащэрэ Iэзэгъу уцхэр шапхъэхэм адештэхэмэ уплъэкIугъэным пае Iофтхьэбзэ гъэнэфагъэхэр блэкIыгъэ илъэсым рагъэкIокIыгъэх.
Зэфэхьысыжьхэм къызэрагъэлъэгъуагъэмкIэ, хэукъоныгъэхэр щыIэх. Мыщ дэжьым къэIогъэн фае цIыфым ипсауныгъэ зэщызгъэкъон зылъэкIыщт Iэзэгъу уцхэр, медицинэ препаратхэр Адыгеим къыращагъэхэу зэрамыгъэунэфыгъэр.
Зэфэхьысыжьхэм пшъэрылъхэр къакIэлъэкIох 
ЯIофшIэн нахь агъэлъэшынэу зафигъэзагъ 
ЦIыфхэм гухахъо хагъотэнэу 
Iофыгъо шъхьаIэр — ЕГЭ-м изэхэщэн 
Бизнесыр хэбзэгъэуцугъэм диштэу