Примерное время чтения: 2 минуты
71

Адыгэкъалэ дэт заводым илиниякIэ ытIупщыгъ

Майкоп, 7 июля - АиФ-Адыгея.

Адыгеим и ЛIышъхьэ ипшъэрылъхэр пIэлъэ гъэнэ-фагъэкIэ зыгъэцэкIэрэ КъумпIыл Мурат Адыгэкъалэ дэт пынджукъэбз заводым щыIагъ. Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм иаппарат Адыгэ РеспубликэмкIэ ифедеральнэ инспектор шъхьаIэу Сергей Дрокиным производствэм иIофшIэн зэрэзэхищэрэм зыщигъэгъозагъ.

ООО-у «Краснодарзернопродукт-Экспо» зыфиIорэр зэхэзыщагъэу Алексей Сидюковым, фирмэм икоммерческэ директорэу Дмитрий Волобуевым, заводым идиректорэу Роман Попик республикэм ипащэ къыфаIотагъ предприятием Iоф зэришIэрэм фэгъэхьыгъэу.

Лэжьыгъэр заводым автоматикэкIэ переработкэ щашIы, компьютерхэр къызфагъэфедэзэ мэлажьэх. ХьакIэхэм цеххэр къаплъыхьагъэх, предприятием иIофышIэхэм адэгущыIагъэх. IофышIэхэм азыныкъо нахьыбэр Адыгэкъалэ щэпсэу.

2013-рэ илъэсым ООО-у «Краснодарзернопродукт-Экспо» зыфиIорэм хэхьэрэ компаниехэм зигугъу къэтшIырэ предприятиер ащэфыгъагъ. Ащ ыуж предприятиер зыпкъ игъэуцожьыгъэным, уахътэм диштэу гъэпсыжьыгъэным инвесторым сомэ миллиони 170-рэ фэдиз апигъэкIодагъ.

2014-рэ илъэсым пынджыр зыщызэтырагъэпхъырэ цехыр атIупщыгъ, чэщ-зымафэм ащ пындж тонни 170-рэ щаукъэбзыщтыгъ. 2016-рэ илъэсым ишэкIогъу къыщегъэжьагъэу предприятием чэщ-зымафэм пындж тонн 250-рэ переработкэ ышIыщтыгъ. Чэщ-зымафэм тонн 270-рэ мыгъэ аукъэбзынэу рахъухьэ.

Джэнч лъэпкъхэр переработкэ зышIыщт цехыкIэр ытIупщынэу КъумпIыл Мурат фагъэшъошагъ. Республикэм ипащэ планшетыр къызфигъэфедэзэ, кнопкэм теIункIи, оборудованиер ытIупщыгъ. Непэ гаджеткIэ перерабатывающэ комплексыр агъэIорышIэ.

Сомэ миллиони 120-рэ зыосэ линиер илъэсрэ ныкъорэкIэ агъэпсыгъ. Чэщ-зымафэм ащ джэнч лъэпкъ тонни 170-рэ фэдиз щаукъэбзы. ЫкIуачIэ изэу Iоф ышIэ зыхъукIэ, предприятием тонн мин 37-кIэ нахьыбэу джыри джэнч лъэпкъхэр щаукъэбзыщтых.

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэм инвесторхэм ариIуагъ Адыгеим ичIыгулэжьхэм нахьыбэу адэлэжьэнхэу. Переработчикхэм зэрэхагъэунэфыкIыгъэмкIэ, республикэм къыщахьыжьырэ лэжьыгъэу заводым переработкэ щашIырэм илъэс къэс хэхъо, пстэумкIи къаIэкIахьэрэм ызытфанэ ар мэхъу.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах