«Единэ Россием» и Апшъэрэ Совет хагъэхьагъ

Новость по теме

Мыекъопэ пивэшI заводым имэфэкI хигъэунэфыкIыгъ

Адыгеим и ЛIышъхьэу, Урысые политикэ партиеу «Единэ Россием» и Адыгэ шъолъыр къутамэ итхьаматэу КъумпIыл Мурат партием и Апшъэрэ Со­вет хагъэхьагъ.

Республикэм ипащэ ащ ыпэ­кIэ партием и Генеральнэ совет хэтыгъ. Партийнэ статусыр нахь ­лъагэ зэрэхъугъэм епхыгъэу рес­публикэмрэ хэгъэгумрэ хэ­хъоныгъэ ашIынымкIэ пшъэ­дэкIыжьэу ыхьырэми нахь зэ­рэхэхъуагъэр Адыгеим и ЛIы­шъхьэ къыIуагъ. Партием изэфэс икIэуххэр зэфихьысыжьхэзэ, КъумпIыл Мурат зэрэхигъэунэфыкIыгъэмкIэ, партиеу «Единэ Россием» ипащэхэм пшъэрылъхэр, анахьэу анаIэ зытырагъэтын фэе лъэныкъохэр къагъэнэфагъэх.

Урысые Федерацием и Пре­зидентэу Владимир Путиным пшъэ­рылъ шъхьаIэу къыгъэнэ­фэгъагъэм — цIыфхэм ящы­IэкIэ-псэукIэ зыкъегъэIэтыгъэным ахэр дештэх.

Политическэ кIочIэ инэу щыт, проектышхохэр щыIэныгъэм щыпхырызыщын зылъэкIырэ политикэ партиеу «Единэ Россием» мыщкIэ мэхьанэшхо раты. КъумпIыл Мурат къызэрэхигъэщыгъэмкIэ, лъэпкъ проектхэм ягъэцэкIэнкIэ республикэм Iофышхо щызэшIуахы. Ахэм анэмыкIэу партийнэ проект 15 Адыгеим щыпхыращы. Ахэм ахэхьэх проектхэу «Къэлэ щы­IэкIэ зэтегъэпсыхьагъ», «КIэлэцIыкIу спорт»,

«Лъэныкъо гу­псэм икультур» зыфиIохэрэр. Ащ фэдэ проектхэр ищыкIа­гъэхэу цIыфхэм алъытэ. «Анахь шъхьаIэр зэхъокIыныгъэхэр къызэрэхъухэрэм цIыф­хэм гу зэрэлъатагъэр ыкIи ахэр партием хэтхэм зэряпхыгъэр къызэрагуры­Iорэр ары. Ары пакIошъ, а зэхъокIыныгъэхэм ахэр нахь чанэу къахэлажьэхэу рагъэ­жьагъ. ТапэкIи респуб­ли­кэм щыпсэухэрэм яшIошIхэр къы­дэтлъытэзэ, зыпкъ итэу ти­IофшIэн зэхэтщэщт. ЦIыфхэм яцыхьэ телъын фае зэкIэ тшIэ­рэр республикэм хэ­хъоныгъэ ышIыным зэрэ­фэIорышIэрэм», — къыIуагъ Адыгеим и ЛIышъхьэ.

Партием ичIыпIэ къутамэхэм яIофшIэнкIэ анахьэу мэхьанэ зиIэхэр цIыфхэм яшIошIхэр къыдэлъытэгъэныр, партием итхьаматэу Дмитрий Медве­девым иобщественнэ прием­нэхэм яIофшIэн гъэлъэшыгъэныр ары. 2020-рэ илъэсым ащ фэдэ приемнэхэр партийнэ гупчэ ашIы­жьыхэ ашIоигъу.

Партийнэ про­ектхэм яхьылIэгъэ къэбархэр зэкIэ ащ къы­щыз­IэкIагъэхьанхэ, партием щы­хэхьанхэ алъэкIыщт. НыбжьыкIэхэр партийнэ Iоф­хэм ахэщэгъэнхэм мэхьанэшхо иI. Адыгеим и ЛIышъхьэ зэри­лъытэрэмкIэ, республикэм ащкIэ амал гъэнэфагъэхэр щызэрахьэх: ныбжьыкIэ сэнаущхэм IэпыIэгъу ягъэгъотыгъэнымкIэ, кадрэ резервым изэхэщэнкIэ пшъэрылъхэр агъэцакIэх.

Джащ фэдэу цIыфхэм яфитыныгъэхэр къэухъумэгъэнхэм, мыкоммерческэ организациехэм IэпыIэ-­гъу ягъэгъотыгъэным, цIыфхэм яшIои­гъоныгъэхэр къыдэлъытэгъэнхэм лъэшэу анаIэ атыра­гъэтыщт. «Ащ фэдэ еплъыкIэхэм аде­сэгъаштэ.

ЦIыфхэм яшIоигъо­ныгъэхэр къыдэлъытэгъэнхэм пае унэшъуакIэхэр штэгъэн фаеу уахътэм пшъэрылъ къе­гъэуцу. Республикэм щыпсэухэрэм зэпхыныгъэ адытиIэнымкIэ амал гъэнэфагъэхэр тэгъэфедэх. Партийнэ гупча­кIэхэр социальнэ зэфагъэмкIэ амалышIоу щытыщтых, цIыфхэм ягумэкIыгъохэм язэ­шIохын фэIорышIэщтых», — къыIуагъ КъумпIыл Мурат.

Партиеу «Единэ Россием» республикэм пэрытныгъэ зэрэщиIыгъыр, ау партием ипроект­хэмрэ хэдзакIохэм яшIоигъоныгъэхэмрэ ягъэцэкIэн акIуачIэ джыри нахь рахьылIэн зэрэ­фаер Адыгеим и ЛIышъхьэ хигъэунэфыкIыгъ.

Смотрите также:

• Iофыгъо шъхьаIэр — ЕГЭ-м изэхэщэн →
• Зэзэгъыныгъэм зэдыкIэтхагъэх →
• ЯIо зэхэлъэу зэдэлэжьэщтых →