Адыгэ Республикэм и ЛIышъхьэу ТхьакIущынэ Аслъан журналэу «Деловая Россия» зыфиIорэм изэхэщакIоу, гупчэу «2025-рэ илъэсым псэущтхэр» зыфиIорэм ипрезидентэу Диана Гуц тыгъуасэ IукIагъ ыкIи журналисткэм иупчIэхэм джэуапхэр къаритыжьыгъэх. Мы журналыр Москва къыщыдэкIы, шъолъырхэм япащэхэм, бизнесым, предпринимательствэм хэщагъэхэм яIофшIэн фэгъэхьыгъэ материалхэр бэу къыхеутых.
Диана Гуц анахьэу зыгъэгумэкIыщтыгъэр ыкIи иупчIэ шъхьаIэхэр зыфэгъэхьыгъагъэхэр кризисым, санкциехэм ялъэхъан республикэм иэкономикэ изытет, инвестициехэм алъэныкъокIэ шъолъырым амалэу IэкIэлъхэр зыфэдэхэр ары. ТхьакIущынэ Аслъан къызэриIуагъэмкIэ, непэрэ уахътэм ехъулIэу Адыгеим ибюджет сомэ миллиард 17 фэдиз мэхъу.
Мы аужырэ илъэсхэр пштэхэмэ, республикэм иэкономикэ инвестициеу къыхалъхьагъэр сомэ миллиарди 140-м ехъу. Шъолъырым къихьэрэ инвесторхэм гумэкIыгъо ямыIэу яIоф рагъэжьэным пае ащ фэIорышIэщт площадкэхэр агъэхьазырых, инфраструктурэр зэтырагъэпсыхьэ, проектыр зыщагъэцэкIэщт чIыпIэхэм гъэстыныпхъэ шхъуантIэр, псыр, электричествэр аращалIэх.
Сыд фэдэрэ лъэныкъокIи административнэ пырыохъу щыIэп.
«ТэркIэ анахь шъхьаIэр IофшIэпIэ чIыпIакIэхэр къызэIухыгъэнхэр, бюджетым къихьэрэ хэбзэIахьхэм ахэгъэхъогъэныр ары. АщкIэ инвесторхэм яшIогъэшхо къэкIо. Шъачэ щыкIорэ экономическэ форумым чанэу тыхэлажьэ, зэзэгъыныгъэхэм тащыкIатхэ, ахэр щыIэныгъэм зэрэпхырытщыщтхэм ыуж тит. Мэхьанэшхо зэттырэ лъэныкъохэм ащыщ зекIоным хэхъоныгъэхэр ышIынхэр, инвестициехэмкIэ тишъолъыр хъопсагъоу щытыныр. Джащ фэдэу сомэ миллиардым ехъу зыосэ бизнес-инкубатор мы уахътэм тэгъэпсы, нэмыкI гухэлъхэри тиIэх», - къыIуагъ АР-м и ЛIышъхьэ.
Адыгеир чIыгулэжь шъолъырэу зэрэщытыр къыдалъытэзэ, мы отраслэм IэпыIэгъу зэрэфэхъухэрэр республикэм ипащэ хигъэунэфыкIыгъ. Илъэс зэкIэлъыкIохэм къакIоцI лэжьыгъэ бэгъуагъэ къызэрахьыжьырэр гъэхъэгъэшхоу ылъытагъ. Промышленностым ылъэныкъокIи Iофхэм язытет зыпкъ итэу зэрэлъыкIуатэрэм кIигъэтхъыгъ, къэзытхырэр «Адыгэ Макъ».
«Гухэлъ гъэнэфагъэ зиIэ программэхэм, проектхэм зэкIэми тахэлэжьэным сыдигъуи тынаIэ тет, ащкIэ федеральнэ гупчэм тыгурэIо. ХэхъоныгъэхэмкIэ, къэгъэлъэгъонэу иIэхэмкIэ Адыгеир къахэщыныр, щысэ зытырахырэ шъолъырхэм ахэтыныр - джары пшъэрылъ шъхьаIэу зыфэдгъэуцужьырэр», - къыIуагъ ТхьакIущынэ Аслъан.
Журналисткэм къытыгъэ нэмыкI упчIэхэми АР-м и ЛIышъхьэ игъэкIотыгъэ джэуапхэр къаритыжьыгъэх, иIофшIэнкIэ анахь мэхьанэшхо зэритырэ лъэныкъохэр къыгъэнэфагъэх.
Гъогум ущысакъын фае 
Лэжьыгъэ бэгъуагъэ къахьыжьыгъ 
ЦIыфхэм гухахъо хагъотэнэу 
АР-м и ЛIышъхьэ иIофшIэгъу зэIукIэгъу 
Зэфэхьысыжьхэм пшъэрылъхэр къакIэлъэкIох