aif.ru counter
46

Москва щызэIукIагъэх

Майкоп, 8 февраля - АиФ-Адыгея.

Урысые Федерацием цIыфхэм якъэухъумэнкIэ ошIэ-дэмышIэ IофхэмкIэ, стихийнэ тхьамыкIагъохэм къыздахьыгъэхэм ядэгъэзыжьынкIэ иминистрэу Евгений Зиничевымрэ Адыгеим и ЛIышъхьэу КъумпIыл Муратрэ машIом республикэм зыкъыщимыштэнымкIэ Iофтхьабзэу зэрахьэхэрэм нахьыбэу шIуагъэ къягъэтыгъэным епхыгъэ Iофыгъохэм атегущыIагъэх.

ЗэIукIэгъум зэрэщыхагъэунэфыкIыгъэмкIэ, федеральнэ къулыкъум имэшIогъэкIосэ подразделение 16-рэ (нэбгырэ 480-рэ, техникэ 63-рэ) республикэ къулыкъум имэшIогъэкIосэ подразделении 2-рэ (нэбгырэ 43-рэ, зы техникэрэ) регион ведомствэм хэхьэх. ТхьамыкIагъо къызыхъукIэ, машIор псынкIэу гъэкIосэжьыгъэнымкIэ мыхэм амалэу яIэр икъурэп. Мы лъэныкъомкIэ псэупIэ заулэ чIыпIэ къин ит. ГущыIэм пае, Тэхъутэмыкъое, Мыекъопэ районхэм мэшIогъэкIуасэхэмрэ къэгъэнэжьын Iофхэм апылъхэмрэ анэсынхэмкIэ уахътэу агъэкIодырэр шапхъэхэм аблэкIы.

Краснодар имэшIогъэкIосэ къулыкъухэр нэбгырэ мин 34-м ехъу зыдэс поселкэу Яблоновскэм машIо къызыщыхъукIэ, игъом нэмысышъухэу къыхэкIы. Джащ фэдэу къушъхьэтхэу Лэгъо-Накъэрэ поселкэу Гъозэрыплъэрэ апэблэгъэ къушъхьэ-турист кластерри икъоу ухъумагъэп. Сыда пIомэ поселкэу Каменномостскэм дэт мэшIогъэкIосэ депом ар километрэ 45-кIэ пэIудзыгъ.

Адыгэ Республикэм и ЛIышъхьэу КъумпIыл Мурат федеральнэ программэм тетэу Тэхъутэмыкъое районымкIэ поселкэу Яблоновскэмрэ Мыекъопэ районымкIэ поселкэу ХъымыщкIэйрэ мэшIогъэкIосэ частитIу ащыгъэпсыгъэным епхыгъэ IофыгъомкIэ Урысыем и МЧС ипащэ зыфигъэзагъ. Поселкэу Яблоновскэмрэ сатыушIыпIэ комплексхэмрэ машIом щыухъумэгъэнхэм мэхьанэшхо зэриIэр зэIукIэгъум къыщыхагъэщыгъ. Джащ фэдэу Адыгеим икъушъхьэ-турист кластер машIом зыкъыщимыштэнымкIэ ищыкIэгъэ Iофтхьабзэхэр зехьэгъэнхэ зэрэфаер хагъэунэфыкIыгъ.

ЦIыфхэм якъэухъумэнкIэ ошIэ-дэмышIэ IофхэмкIэ специалистхэм ягъэхьазырын, мэшIогъэкIосэ къулыкъухэр мылъкукIи, техникэкIи нахь зэтегъэпсыхьэгъэнхэм япхыгъэ Iофыгъо заулэмэ ахэплъагъэх.

ЗэIукIэгъум икIэуххэм атетэу министрэу Евгений Зиничевым подразделениехэм япащэхэм пшъэрылъ гъэнэфагъэхэр афишIыгъэх.



Оставить комментарий
Вход
Комментарии (0)

  1. Пока никто не оставил здесь свой комментарий. Станьте первым.


Оставить свой комментарий
Самое интересное в регионах