Адыгеим исоциальнэ-экономическэ хэхъоныгъэ фэгъэхьыгъэ зэхэсыгъоу Москва непэ щыкIуагъэм Урысые Федерацием мэкъу-мэщымкIэ иминистрэу Дмитрий Патрушевым пэщэныгъэ дызэрихьагъ, ащ хэлэжьагъ Адыгэ Республикэм и ЛIышъхьэу КъумпIыл Мурат.
Тишъолъыр исоциальнэ-экономическэ хэушъхьафыкIыгъэ программэ ипроект зэхэсыгъом щытегущыIагъэх.
Республикэм исоциальнэ-экономическэ зытет уплъэкIугъэным, ар нахьышIу шIыгъэнымкIэ екIолIакIэхэр къыхэхыгъэнхэм афэгъэхьыгъэ зэхэсыгъохэр, IофшIэгъу дэкIыгъохэр ыпэкIэ зэхащэгъагъэх, ахэр гъогу картэм къыщагъэлъэгъуагъэх.
Дмитрий Патрушевым къызэриIуагъэмкIэ, УФ-м и Правительствэ и Тхьаматэ ипшъэрылъкIэ IофшIэгъу дэкIыгъо зэхэсыгъоу Адыгеим щызэхащагъэм изэфэхьысыжьхэмкIэ гъогу картэр агъэпсыгъ.
«Хэхъоныгъэхэм ялъэныкъо шъхьаIэхэр мы тхылъым къыщыгъэнэфагъэх. РеспубликэмкIэ анахь мэхьанэ зиIэхэр транспорт ыкIи энергетическэ зэтегъэпсыхьаныгъэхэр, гъэстыныпхъэ шхъуантIэр ягъэгъотыгъэныр ыкIи промышленностыр, предпринимательствэ цIыкIумрэ гурытымрэ, зекIоныр ыкIи мэкъумэщ-къыдэгъэкIыжьын комплексыр», — къыщиIуагъ зэхэсыгъом Дмитрий Патрушевым.
ХэушъхьафыкIыгъэ программэм ипроект джащ фэдэу хагъэхьагъэх псауныгъэм икъэухъумэн, гъэсэныгъэм, культурэм, экологием, социальнэ фэIо-фашIэхэр зэшIозыхыхэрэм, физическэ культурэмрэ спортымрэ алъэныкъокIэ кIэзыгъэгушIущтхэ Iофыгъохэр.
«Адыгеир нэмыкIхэм янэкъокъунымкIэ илъэкIхэм ахэгъэхъогъэнымкIэ, лъэпкъ проектхэм къахиубытэрэ Iофыгъохэр икъоу зэшIохыгъэнхэмкIэ непэ пшъэрылъышхохэр тэгъэуцух. Мы IофшIэнымкIэ мэхьанэшхо зиIэр федеральнэ гупчэм къыддыригъэштэныр ары. УФ-м мэкъу-мэщымкIэ и Министерствэ шIуагъэ къытэу тызэрэдэлажьэрэм ихьатыркIэ Адыгеим нахь псынкIэу хэхъоныгъэ ышIыным фэIорышIэщт Iофыгъохэр дгъэнэфагъэх. Гъогу картэм ипроект хагъэуцоным пае шъолъырым игукъэкIи 150-рэ фэдиз къагъэлъэгъуагъ. Ахэр лъэныкъо пстэуми афэгъэхьыгъэх ыкIи Адыгеим щыпсэухэрэм ящыIакIэ нахьышIу шIыгъэным тегъэпсыхьагъэх», — къыIуагъ КъумпIыл Мурат.
Урысыем мэкъу-мэщымкIэ и Министерствэ тхылъым ипроект хэплъэнхэу федеральнэ гъэцэкIэкIо хабзэм икъулыкъухэмрэ зышIогъэшIэгъоныщт организациехэмрэ афигъэзагъ.
Лъэпкъ проектхэр зэрагъэцакIэхэрэм тегущыIагъэх 
Лъэпкъ проектхэм ягъэцэкIэн — пшъэрылъ шъхьаI 
КъумпIыл Мурат зэIукIэм хэлэжьагъ 
Инэм иIофыгъохэм атегущыIагъэх 
КъумпIыл Муратрэ Дмитрий Патрушевымрэ зэIукIэгъу Москва щызэдыряIагъ