Примерное время чтения: 2 минуты
59

КъумпIыл Муратрэ Дмитрий Патрушевымрэ зэIукIэгъу Москва щызэдыряIагъ

Майкоп, 4 июля - АиФ-Адыгея.

Адыгеим и ЛIышъхьэу КъумпIыл Муратрэ Урысые Федерацием и Правительствэ ыцIэкIэ республикэм икураторэу, Урысыем мэкъу-мэщымкIэ иминистрэу Дмитрий Патрушевымрэ тыгъуасэ зэIукIэгъу Москва щызэдыряIагъ.Республикэм социальнэ-экономикэ хэхъоныгъэ зэришIыщтым епхыгъэ Iофыгъохэр мыщ къыщаIэтыгъэх.

Отраслэ зэфэшъхьафхэм яIофхэм язытет, Iофыгъоу къэуцугъэхэм ыкIи ахэм язэшIохынкIэ амалэу щыIэхэм атегущыIагъэх.

Джащ фэдэу зэIукIэгъум хэлэжьагъэх Урысыем мэкъу-мэщымкIэ иминистрэ иапэрэ гуадзэу Хьатыу Джамболэт, Адыгеим ыцIэкIэ сенаторэу Хъопсэрыкъо Мурат, Адыгэ Республикэм ивице-премьерэу Сапый Вячеслав, республикэ министерствэхэм япащэхэр.

Адыгэ Республикэм и ЛIышъхьэ зэрэхигъэунэфыкIыгъэмкIэ, илъэс заулэ хъугъэу Адыгеим экономикэмкIэ Iофхэр зыпкъ щитых. Ар къеушыхьаты республикэм пстэумкIи продукциеу къыщахьыжьырэм зэрэхахъорэм. Мы лъэныкъомкIэ республикэр Урысыемрэ Къыблэ федеральнэ шъолъырымрэ ягурыт шапхъэхэм ашъхьадэкIы. 2018-рэ илъэсым пстэумкIи продукциеу къахьыжьыгъэм проценти 3,4-кIэ хэхъуагъ, сомэ миллиарди 110-м ехъугъ. ГъэрекIо Адыгэ Республикэм икапитал шъхьаIэ инвестициехэр проценти 142,5-кIэ нахьыбэу къыхалъхьагъэх, сомэ миллиард 31,6-рэ ар хъугъэ.

Республикэм ипащэхэм гъэхъагъэу тиIэхэм такъыщыуцу мыхъунэу алъытэ. Iофым изытет зэхъокIыгъэным тегъэпсыхьагъэу республикэм хэхъоныгъэ зэришIыщт стратегиер къыхахыгъ, цIыфхэм ящыIэкIэ-псэукIэ зыкъезыгъэIэтыщт лъэпкъ проектхэр пхыращыхэу аублагъ. Федеральнэ гупчэм IэпыIэгъоу къыритыщтым АдыгеимкIэ мэхьанэшхо иI. КъумпIыл Мурат зэрилъытэрэмкIэ, республикэм нахь псынкIэу хэхъоныгъэ ышIынымкIэ кураторствэм амалыкIэхэр къытыщтых.

«Республикэм иэкономикэ ылъэныкъохэу анахьэу хэхъоныгъэ зэдгъэшIыщтхэр дгъэнэфэгъахэх. Апэрэ чэзыоу ахэр — промышленностыр, мэкъу-мэщыр, туризмэр ары. Ахэм хэхъоныгъэ ашIынымкIэ зэкIэ амалхэр тиIэх, ащ хэхьэх чIыопс-ресурс, рекреационнэ амалхэр, чIыпIэ дэгъу шъолъырым зэриубытырэр. Республикэм исоциальнэ-политикэ Iофхэр зыпкъ зэритхэр Адыгеим хэхъоныгъэ езыгъэшIыщт амал шъхьаIэхэм зэу ащыщ. Пшъэрылъэу къытфашIыгъэхэм ягъэцэкIэнкIэ ищыкIэгъэ Iофтхьабзэхэр зетэхьэх. Республикэм икуратор IэпыIэгъоу къытитырэр типшъэрылъхэм ягъэцэкIэнкIэ къытфэфедэ», — къыIуагъ Адыгеим и ЛIышъхьэ.

Джащ фэдэу экономикэм ихэхъоныгъэ къызэтезыIажэхэрэм, Iофыгъоу къэуцугъэхэм язэшIохыкIэ хъущтхэм зэIукIэгъум щатегущыIагъэх.

Урысые Федерацием мэкъу- мэщымкIэ иминистрэу Дмитрий Патрушевым къызэрэхигъэщыгъэмкIэ, республикэм игъоу ылъэгъухэрэм ахэплъэщтых. Экспертхэм унашъохэр къыхахынхэм пае чIыпIэм кIохэзэ, Iофхэм язытет зэрагъэшIэн фае.

Гъогу картэу Адыгеим социальнэ-экономикэ хэхъоныгъэ езыгъэшIыщт Iофтхьабзэхэр зэрытыщтыр мазэмкIэ республикэм къыхихын фае.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах