Урысыем иполитическэ партиеу «Единэ Россием» и Адыгэ шъолъыр къутамэ иполитсовет изэхэсыгъо тыгъуасэ Мыекъуапэ щыкIуагъ. Ащ иIофшIэн хэлэжьагъэх партием и Апшъэрэ Совет хэтэу, Адыгэ Республикэм и ЛIышъхьэу ТхьакIущынэ Аслъан, «Единэ Россием» ифракциеу АР-м и Парламент щыIэм илIыкIохэр, чIыпIэ отделениехэм ясекретарьхэр, нэмыкIхэри.
Мэзаем и 5 — 6-м партием ия XV-рэ Зэфэс иапэрэ едзыгъоу Москва щыкIуагъэм зэфэхьысыжьэу фэхъугъэхэм къэзэрэугъоигъэхэр атегущыIагъэх. Джащ фэдэу пэшIорыгъэшъ хэдзынхэм язэхэщэн фэгъэзэгъэщт региональнэ зэхэщэкIо комитетым хэтыщтхэр агъэнэфагъэх.
ЗэлъашIэрэ партийцэхэм адакIоу, «Единэ Россием» дезыгъаштэхэрэр, общественнэ организациехэм ялIыкIохэр, къэбар жъугъэм иамалхэм яIофышIэхэр ащ хэхьагъэх, зэкIэмкIи нэбгырэ 11 мэхъух. Партием ишъолъыр къутамэ иполитсовет и Секретарэу, АР-м и Къэралыгъо Совет — Хасэм и Тхьаматэ игуадзэу Iащэ Мухьамэд зэфэсым унэшъо шъхьаIэу щашIыгъэхэм, зэфэхьысыжьхэм къатегущыIагъ.
Политсоветым и Секретарь къызэриIуагъэмкIэ, «Единэ Россием» изэфэс 2015-рэ илъэсым зэрэщымыIагъэм къыхэкIыкIэ, Апшъэрэ ыкIи Генеральнэ советхэм, лъыплъэкIо-ревизионнэ комиссием ахэтхэм япроцент 30 зэблахъугъ. Партием и Генеральнэ Совет хагъэхьагъ Адыгеим илIыкIоу, Фэдз къоджэ псэупIэм ипащэу Тлъостнакъэ Рэмэзан. Жъо-ныгъуакIэм и 22-м рагъэкIокIыщт пэшIорыгъэшъ хэдзынхэм языфэгъэхьазырын фэгъэзэгъэ федеральнэ зэхэщэкIо комитетым хэтыщтхэр зэфэсым щагъэнэфагъэх, джащ фэдэу праймеризым ипроект фэгъэхьыгъэ положениер аштагъ.
Ащ къызэригъэнафэрэмкIэ, пэшIорыгъэшъ хэдзынхэм уахэлэжьэн зэрэплъэкIыщтыр зы — кандидатым ежь зыкъыгъэлъэгъожьыныр ары. Фаехэр зэкIэ праймеризым къекIолIэнхэ, агу рихьырэ кандидатым амакъэ фатын алъэкIыщт. Ащ епхыгъэ «рейтинговэ голосова¬нием» къызэригъэнафэрэмкIэ, бюллетеньхэм арытхэгъэ кандидат заулэмэ хэдзакIохэм амакъэ афатын амал яIэщт.
Ащ ишIуагъэкIэ, цIыфхэм нахь зыдырагъаштэхэрэр, цыхьэ зыфашIыхэрэр къэнэфэщтых. Шъугу къэдгъэкIыжьын, партием зэхищэщт праймеризым хэлажьэ зышIоигъохэм ятхылъхэр къатынхэмкIэ мэзитIу пIалъэ яIэщт. Мэзаем и 15-м къыщегъэжьагъэу мэлылъфэгъум и 10-м нэс кандидатхэм ялъэIу тхылъхэр къарахьылIэнхэ алъэкIыщт. Мэлылъфэгъум и 15-м регистрациер аухыщт.
Хэдзынхэм ахэлэжьэщт кандидатхэр агъэнэфагъэх 
ТхьакIущынэ Аслъан фэгушIуагъ 
ЯмэфэкI хагъэунэфыкIыгъ (26.07.2016) 
ЯIофшIэн агъэлъэшынэу къафигъэпытагъ 
Iофхэм язытет тегущыIагъэх