Примерное время чтения: 2 минуты
106

Адыгеим федеральнэ мылъку къыIэкIэхьащт

Адыгэ Республикэм ипсэолъищ федеральнэ программэу «2020-рэ илъэсым нэс псы хъызмэт комплексым хэхъоныгъэу ышIыщтыр» зыфиIорэм хэхьагъ. Псэуалъэ пэпчъкIэ республикэм бюджет проектыр къыгъэшъыпкъэжьыгъ ыкIи зэнэкъокъум щыпхырыкIыгъ.

Адыгэ Республикэм и ЛIышъхьэу КъумпIыл Муратрэ псы къэкIуапIэхэмкIэ Федеральнэ агентствэм ипащэ ипшъэрылъхэр зыгъэцэкIэрэ Вадим Никанорэвымрэ тапэкIэ зэдашIыгъэгъэ зэзэгъыныгъэхэм къакIэкIогъэ IофшIэнышхом мыр икIэух хъугъэ.

Хабзэм иреспубликэ ыкIи ифедеральнэ къулыкъухэм шIуагъэ къэзытырэ зэдэлэжьэныгъэу зэдыряIэм ишIуагъэкIэ псэолъищмэ ателъытагъэу сомэ миллиони 130-рэ субсидиеу Адыгеим къыфыхэгъэкIыгъэным фэгъэхьыгъэ унашъо аштагъ. Республикэ бюджетым сомэ миллион 13 ащ къыфыхигъэкIыщт.

Ащ ишIуагъэкIэ 2019 — 2020-рэ илъэсхэм республикэм ит селоу Вольнэм дэжь псыхъоу Лабэ дамбэ километри 4,1-рэ щагъэпсыщт, Шэуджэн районымкIэ псыхъоу Фарзэ дамбэ километрэ 28-рэ фэдиз игъэкIотыгъэу щагъэцэкIэжьыщт, Красногвардейскэ районымкIэ псыхъоу Псынэшъу идамбэ щыщ километритIу фэдиз игъэкIотыгъэу агъэцэкIэжьыщт.

«Федеральнэ гупчэм IэпыIэгъоу къытитыщтым ишIуагъэкIэ проектышхо дгъэцэкIэн тлъэкIыщт — дамбэхэм ячIыпIэ анахь щынагъохэм IофшIэнхэр ащыдгъэцэкIэщтых ыкIи дамбакIэ тшIын тлъэкIыщт. Псыр къыдэкIыным ищынагъо хэпшIыкIэу тиреспубликэ къыщыкIичынымкIэ ащ ишIуагъэ къэкIощт», — къыIуагъ Адыгэ Республикэм и ЛIышъхьэу КъумпIыл Мурат.

Шъугу къэтэгъэкIыжьы: Адыгэ Республикэм иминистрэхэм я Кабинет иIэпэчIэгъэнэ фонд икъэкIуапIэхэм яшIуагъэкIэ мы илъэсым нэпкъхэм ягъэпытэн сомэ миллион 60 фэдиз пэIуагъэхьагъ. Ащ нэмыкIэу Тщикскэ псыIыгъыпIэм иукъэбзынкIэ ыкIи инэпкъхэм ягъэпытэнкIэ Адыгеим Iофтхьабзэхэр щызэшIуахыхэу рагъэжьагъ. Федеральнэ программэу «Экологическая реабилитация водных объектов» зыфиIорэм тегъэпсыхьагъэу илъэсиплIым къыкIоцI чэзыу-чэзыоу IофшIэнхэр зэшIуахыщтых. Федеральнэ бюджетым щыщэу сомэ миллиони 150-рэ а пшъэрылъым пэIуагъэхьащт. Джащ фэдэу псыхъоу Джаджэ игъэкъэбзэн сомэ миллион 15-м ехъу илъэс къэс федеральнэ субвенциехэм яшIуагъэкIэ пэIуагъэхьащт. Непэ Мыекъопэ районым ит къутырэу Калининым иIэгъо-благъохэм ащ фэдэ IофшIэнхэр ащэкIох.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах