Примерное время чтения: 2 минуты
55

Адыгеим и ЛIышъхьэ паспортхэр аритыжьыгъ

Майкоп, 13 июня - АиФ-Адыгея.

Урысыем и Мафэ фэгъэхьыгъэ Iофтхьабзэхэр Мыекъуапэ икъэлэ парк мэкъуогъум и 12-м щыкIуагъэх. А мафэм Урысыем иныбжьыкIэхэм ащыщхэм паспортхэр аратыжьыгъэх, концерти щыIагъ.

Адыгеим и ЛIышъхьэу КъумпIыл Мурат мэфэкI Iофтхьабзэхэм ахэлэжьагъ. Республикэм щыпсэухэрэмрэ ихьакIэхэмрэ зафигъазэзэ, республикэм и ЛIышъхьэ хигъэунэфыкIыгъ мэкъуогъум и 12-р тихэгъэгу итарихъ пытэу зэрэхэхьагъэр.

«ИлъэсипшI заулэ хъугъэ Урысыем и Мафэ хэгъэгум инепэрэ, инеущырэ мафэкIэ пшъэдэкIыжь зэрэтхьырэм, ащ шIулъэгъуныгъэу фытиIэм, цIыф лъэпкъыбэхэр зэкъозыгъэуцорэ шIуагъэхэм ятамыгъэу зыщытыр», — къыIуагъ КъумпIыл Мурат.

Республикэм и ЛIышъхьэ зэрэхигъэунэфыкIыгъэмкIэ, Урысыем и Президентэу Владимир Путиным къыгъэуцугъэ стратегическэ пшъэрылъхэм зэу ащыщ урысые обществэм изыкIыныгъэ ехьылIэгъэ Iофыгъор. КъумпIыл Мурат ицыхьэ зэрэтелъымкIэ, лъэпкъхэм языкIыныгъэрэ язэкъотыныгъэрэ къызаухъумэкIэ ары ныIэп гухэлъэу яIэхэр къадэхъунхэ, Адыгеимрэ Урысыемрэ апае бэ ашIэн залъэкIыщтыр, къэзытхырэр Адыгэ Республикэм и ЛIышъхьэ ипресс-къулыкъу.

ЕджэнымкIэ гъэхъэгъэ дэгъухэр зышIыгъэ кIэлэеджэкIо 12-мэ Урысыем и Мафэ Урысые Федерацием игражданин ипаспорт аратыгъ. Ар аритыжьзэ, Адыгеим и ЛIышъхьэ ныбжьыкIэхэм афэлъэIуагъ ящыIэныгъэ дахэу зэпыфэнэу, тыдэрэ лъэныкъокIи гъэхъагъэхэр щашIынхэу.

Адыгеим и ЛIышъхьэ нэмыкIэу кIэлэеджакIохэм афэгушIуагъэх Адыгэ Республикэм и Къэралыгъо Совет —Хасэм и Тхьаматэу Владимир Нарожнэр, Урысые Федерацием и Общественнэ палатэ хэтэу МэщбэшIэ Исхьакъ, Мыекъуапэ имэрэу Андрей Гетмановыр.

Республикэм ихабзэ игъэцэкIэкIо, изаконодательнэ къулыкъухэм, общественнэ объединениехэм ялIыкIохэр, общественностыр мэфэкI Iофтхьабзэхэм ахэлэжьагъэх.

Лъэпкъ орэдхэмкIэ Къэралыгъо ансамблэу «Ислъамыем», Адыгэ Республикэм и Къэралыгъо филармоние, эстрадэ ансамблэу «Ошъутенэм», урыс лъэпкъ Iэмэ-псымэхэмкIэ оркестрэу «Русская удаль» зыфаIорэм яартистхэр, республикэм итворческэ коллектив анахь дэгъухэм якъэшъуакIохэр концертым хэлэжьагъэх.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах