Адыгеим и ЛIышъхьэу КъумпIыл Мурат Адыгэ Республикэм и Правительствэ и Унэ тыгъуасэ щыригъэблэгъагъэх кинокомпаниеу «Медведьфильмпродакшн» зыфиIорэм игенеральнэ пащэу, дзэ-тарихъ фильмэу «Батальон» зыфиIорэм ипродюсерэу Наталья Медведевамрэ картинэм ипродюсерэу Юлианна Медведевамрэ. Адыгэ Республикэм культурэмкIэ иминистрэу Аулъэ Юрэ зэIукIэгъум хэлэжьагъ.
СерииплI хъурэ фильмым итехын изэхэщэнкIэ республикэм ипащэхэм яшIуагъэ къызэрарагъэкIыгъэм пае зэрафэразэхэр продюсерхэм къаIуагъ. Мазэм къыкIоцI мы кинокомпанием Адыгеим техын Iофтхьабзэхэр щызэшIуихыгъэх. Телеканалэу НТВ-м заказыр иягъ, къыдэзыгъэкIыгъэр «Киностудиеу КИТ» зыфиIорэр ары. ЗэрэгугъэхэрэмкIэ, НТВ-м илъэс горэмкIэ ар къыгъэлъэгъощт.
Продюсерхэм къызэраIуагъэмкIэ, техыныр амыублэзэ лъэпкъ фильмымкIэ удостоверениер къаратыгъ, тарихъ хъугъэ-шIагъэхэм тырахыгъэр адиштэным пае упчIэжьэгъухэри къызфагъэфедагъэх. Югославием щыкIогъэ уIэшыгъэ зэIуупIэныгъэм илъэхъан Приштинэ дэт аэропортыр урысые подразделениехэм 1999-рэ илъэсым зэраштэгъагъэм фэгъэхьыгъэу мы фильмым къеIуатэ.
Адыгеим техын Iофхэр зэкIэ щыкIуагъэх пIоми хъущт. ЦIыфхэр жъугъэу зыхэлэжьэгъэхэ сценэхэм япроцент 70-м ехъум республикэм исхэм ащыщхэр ахэлэжьагъэх, дзэ артбригадэхэу Мыекъуапэ щыIэхэми яшIуагъэ къагъэкIуагъ.
ЗэдэгущыIэгъум илъэхъан Адыгеим и ЛIышъхьэ къызэрэхигъэщыгъэмкIэ, республикэм апэрэп техынхэр зэрэщызэхащэхэрэр, чIыпIэу зыдэгъэзагъэм, ищынэгъончъагъэ, хьакIэхэмкIэ нэгуихыгъэу зэрэщытым пае кинопроектхэр гъэцэкIагъэ щэхъух.
Наталья Медведевам къыхигъэщыгъ илъэс псаум къыкIоцI фильмхэр щытепхынхэмкIэ Адыгеим амал дэгъухэр зэриIэхэр, чIыопсыр дэхэ дэд, щынэгъончъэу щыт.
Адыгеим тапэкIи а лъэныкъомкIэ хэхъоныгъэ ышIыным пае КъумпIыл Мурат республикэм культурэмкIэ иминистрэ пшъэрылъ фишIыгъ кинокомиссиехэм язэхэщэнкIэ нэмыкI шъолъырхэм IофшIэкIэ амалэу аIэкIэлъ хъугъэм зыщигъэгъозэнэу.
ЗэрэхагъэунэфыкIыгъэмкIэ, джащ фэдэу кинокомпаниехэм зэдэлэжьэныгъэ адыряIэ хъумэ, хэбзэIахьхэри нахьыбэ хъущтых, IофшIэпIэ чIыпIакIэхэри къэхъущтых, нахь лъэшэуи цIыфхэм анаIэ къыттырадзэщт, ижъырэ адыгэ культурэмрэ тичIыопс дахэрэ нахь зэлъашIэщтых.
КъумпIыл Мурат Адыгеим щыщ ныбжьыкIэхэу Москва щеджэхэрэм аIукIагъ 
Яамалхэм ахэхъуагъ 
Лъыплъэн Iофыр нахь агъэлъэшыщт 
Дин зэфыщытыкIэхэм атегущыIагъэх 
ЯIофшIэн агъэлъэшынэу къафигъэпытагъ